SAC Ralkap Ruangah Hliamhma Tuar Mi Hna Cu Aizawl Sii-inn Ah Mipi Nih Nan Chawva In Nan Bawmh Cio Mi Hna An Si, Bawmh An Herh Tuk Rih

Aizawl ah hrambunh in. ral ruangah hliamtuar mi hna cu mipi nih nanpek mi chawva hmang in Vaurawng le

CRCM i bawm in zohkhenh cuahmah an si,mipi Kan miphun caah tlacamnak le chawva pekchanhnak a herh hringhran ko. Crd; Lal Siammawi

Thanchonak Dawntu Kan Si Sual Maw? Voikhat cu mizaw pahnih sii-inn ah an phan. Thlalangawng pakhat lawng a si mi khaan ah ihkhun pakhat veve ah an ihter hna. Thlalangawng kam ah pakhat an ihter i anih hi a dam lonak ruangah zanlei fatin suimilam pakhat chung a ṯhut in na ṯhu lai.

Na duh cun khua na cuan kho tiah, a zohkhenhtu hna nih bia an cah. Vam khatlei kam it pa bel cu chunzan hlan in ih peng an fial. Anmah pahnih lawng an um caan, hngilh caan nih an biaka thawt a tan hna hlan cu tlok sup in bia an i ruah.

An nupile kong, an fale kong, an chungkhar kong, an inn le lo le an rian kong tiang i hal in bia lungduh an i ruah. A caan ah capo an sai, an chunmang tiang hlawptlo ngai in an i ruah.

Voikhat zanlei sang cu thlalangawng kam it pa khua a cuan. Sii-bawite nih hi tiang lawng na nung lai tiah an chimh mi suimilam caan a hung tlin deng caan te khi si. Lei thuah riat tang ciamh lai a hngalh cuahmah ko bu ah mithmai panh te khin, a khua cuanh mi kong a hawipa a hei ruah.

Kan umnak sii-inn kam ah hring curh in a zau mi park (tlonlennak) a um. A chung ah tidil zong an um chih. Tidil ah cun compei le varaang pawl an i lio. Anmah lak ah ngakchia rual zong mahte zah mi lawng i cit in an i nuam.

A pawng hramh hring ah ngaknu tlangval hna kut sih in a leng mi le aa nuam mi mi tampi zong an um. Par phun tling in a par mi lak ah a chok mi minung, vanva hna le palep hna zong duh tlin cuainak ram hluan in an leng hna. Van a thiang i khuapi cuanhnak tiang khi hmuh khawh a si.

Damte kan chuak lai i kan kal ve te lai, tiah forhfialnak he a hei chimhruah. A biachim ngaitu cu mitchinh bu khin a mitthlam in cu tluk a nuam ding mi hmun cu a hei suaisam ve. Cuticun a caan ah ralkap pawl an i cer, cucu an tuah ti’n zanlei fatin a thut caan paoh ah a hei chimh tawn.

Vam kam it pa nih cu tluk hmuh nuam mi hmun zoh le hmuh ve cu dakdak in caak. A hngar kho tuk. Caan a hung kal, nithla a hung liam chin. Ni dang bang zing ni ceu dawh a hung tlang. Hi zing cu thawng a dai. Zohkhenhtu (nurse) nih takkholhnak thilri he nan tho tha maw, tiah a hun ti hna.

Lehnak aw khat lawng a theih. Thlalangawng kam pa cu a van zoh i daite in a rak thih kha a hmuh. Ngaihchiatnak mithmai he sii-inn riantuantu dang pawl a va auh hna i nunnak a ngei ti lo mi takpum cu an kalpi. Thlalangawng it pa thih caangka vampang it pa nih a ihnak thial awk tha hnga maw, tiah a hal hna. Zohkhenhtu nih a nawl hna bang an thial hnu ah an chuahtak.

An chuahtak caangka cun a tho kho lo nana-in a kiu an hun i doh i thlalangawng ah a hngawng a van tun. Lenglei a zoh cu vampang nakpi aa chon kha a hmuh. A hawipa nih hlawptlo ngai in a rak chimh mi hmun nuam le zohdawh vialte hmuh a rak duh tuk mi cu vampang nakpi a rak si.

Lungsi lo ngai khin a hngawng a thumh iahmah. Zohkhenhtu nu a hung luh bak khin, “atu nai nan chuahpi mi ka hawipa nih khan dahngai, hring curh i a zau mi pangpar dum, tidil le nuam ngai in a leng mi hna ka hmuh hna, tiah a ka chimh ṯung. Ziah! vampang nakpi lawng pei si ko hi, a hei ti.” Minu nih a thawh, “Mah pa kha mitcaw a si e.

An chimh mi cu, thazaaang pek le forhfial an duh caah a si e, a ti. Lawmhnak kan ti mi hi, ngaihchiat lo khi a si lem lo. Nuamhnak i a ralkah zong hi nun-cen khawh a si fawn lo. Lawmhnak taktak hi mi dang ca ah bawmchantu si khawhnak in a luang mi tihna a si. Midang thachiatnak lawng a chimrel peng mi, soiselnak lam lawng a kawl mi hna nun ah lawmhnak a um kho lo.

Tutan kan dohtlennak zong ah hin tha petu tampi lak thangchiatnak le soiselnak biakam lawng a phawk mi an um len. Bantuk hna bia khi, theitu thinlung ah riahter an phu lem lo. Mifim bia ah, na thanchonak lam ah an dawnkhantu minung a si mi paoh va hrial hna ti si bang, kan derthawmnak a si mi cu kan hrial hna ah a tha.

Minung hi thinlung ruahnak in a nung mi kan si i forhfialnak hi a mikip thanchonak hrampi a si. Cucaah zei thil kan tuah hmanh ah, a chiatnak lei in ruahnak a kan petu hna nakin, forhfialtu hna bia kan ei deuh awk a si. Kan baibal chung Nehemiah nih Jerusalem kulhnak vampang a remh lio kha ruat hmanh, dawnkhantu tampi a ngei. Sa le ral lakah rian an thawk.

Soiseltu le thangchiattu tampi a ngei. Sihmanhsehlaw tha petu hna bia in a kalpi i ni 52 chung ah a lim diam. Kulhnak vampang aa chon hnu ah duhdimte le nuam tein a him mi kulhnak vampang chung ah an tlongleng, khua an sa i an biak Pathian an thangthat. Cubantukin atu kan dohthlennak zong ahhin kan si awk a si.

Soiseltu le thangchiattu hna ruangah kan hmabaan chiahtak awk tha lo, kan kalpi chih lai i Pathian bawmhnak he zalonnak chung kan luh tikah, kanmahte ah kanmah tein khuakhan lairelnak kan ngei lai, kanmah tein kan i uk te lai i zalong tein kan biak Pathian kan thangthat ve te lai. Salai C. Twintwin