SAC Ralkap Thazaang 100 Leng Nih PDF Sakhaan An Luh Hnawh Caah An Sakhan An Sungh Hlei Ah Phaisa Sing 800 Leng Man An Sung E
Pakokku Peng PDF Sakhan Cu SAC Ralkap Nih An Luhhnawh Caah Kyats Sing 800 Leng Man An Sung. Magway ramṭhen, Pauk peng um Pakokku pengkomh PDF sakhan pakhat cu SAC ralkap MI 35 Helicopter 1 le ke ralkap 100 leng nih an luhhnawh i an khangh, tiah Pakokku pengkomh Battalion 14, Companny 2 in ṭuanvo ngeitu pakhat nih a chim.
March ni 17 lioah Pauk peng chaklei um Pakokku pengkomh Battalion 14, Companny 2 (Black Guerrilla Force) sakhan cu MI 35 Helicopter 1 le ke ralkap 100 leng nih an luhhnawh i an khangh, tiah theih a si.
“March ni 17 ah kan sakhan cu SAC ralkap 100 leng nih, an rak luhhnawh pin ah Helicopter nih an bawmh hna. Sentari congtu kan ralkap hna nih tuan ah an hmuh hna caah kan luat dih. Kan sakhan kan sunghmi hi kyats sing 800 man tluk a si lai,” tiah Pakokku pengkomh Battalion 14, Companny 2 in ṭuanvo ngeitu pakhat nih a chim.
SAC ralkap nih Pakokku pengkomh Battalion 14, Companny 2 an sakhan an khangh caah hriamngan kuan 500 le RPG kuan tam ngai an ciam, tiah theih a si. The Chin Post
Bago ramṭhen, Nyaunglaypin pengkomh, Kyaukgyi peng Khah Lah Yah 60 in SAC ralkap nih, March ni 18 ah hriamngan duh paoh in an thlah caah tualchung mi 2,696 cu an inn le lo zamtak in ral an hrial, tiah March ni 19 ah Karen National Union (KNU) nih cathanh an chuah.
Htuanikone, Sepale, Yelay-Karen le Yelay-Burma khua in innchungkhar 511, milu in 2,600 leng cu ralhrial in an zaam hna. Hnawngkone khua um Khah Lah Yah 60 in SAC ralkap nih hriamngan an kah caah Yelay-Karen khua ah hriamngan kuan a tla i, Caw pathum hliamhma an pu, tiah an langhter.
SAC ralkap nih hriamngan in an kah ruang ah tualchung mi 2,600 leng ralhrial in a zaammi chung ah hliamhma pumi le a thimi an um le um lo theih a si rih lo.
KNU kuttang Karen National Liberation Army (KNLA) Brigade 3 hmunram Nyaunglaypin pengkomh chung ah SAC ralkap nih hriamngan atu le atu an kah lengmang, tiah tualchung mi hna sin in theih a si.
SAC nih cun KNLA he an i kahdohnak kong thawngthanhnak an tuah rih lo. SAC nih nawlngeihnak an laak hnu in KNU kuttang KNLA le SAC ralkap kar kahdohnak hi voi 8,000 leng a chuak cang, tiah theih a si. TCP
