SAC Uico Ralkap Thazaang 200 Hrawng Le Mipi Vengtu Ralkap Kahdohnak Ah Mipi Lei Thi Le Hliam An Tam
Magwe ramṭhen Gangaw peng Hnankha khua nichuahlei ah SAC ralkap hna le mizapi vengtu ralkap kahdohnak a chuak i, cu kahdohnak ah cun PDF in minung 5 an nunnak a liam, minung 4 nih hliamhma an tuar, tiah khua mi hna sin in theih a si. Kalaymyo in a rami SAC ralkap minung thazaang 200 hrawng le mizapi vengtu ralkap hna cu nizaan March 20 chunhnu suimilam 12:00 in zaanlei suimilam 3:00 tiang an i kap.
“Ram caah nunnak a liam mi mipi ralkap ruak hna cu atu tiang lak khawh an si rih lo. SAC ralkap lei in sniper le hriamngan hmang in an kan kah. Nunnak a liammi hna cu kum 30 luan hna le , kum-20 mi hrawng pakhat an si. Hliamhma a tuar mi hna cu an kee, an phei le an keng ah kuan nih a hliamh hna.
Pakhat cu a cal ah kuan nih a hnor fawn,” tiah khua mi pakhat nih a chim. Kaphnih kahdohnak ah hin Tawng Khayan (တောင်ခရမ်း) khua palik sakhan lei zong in hriamngan an kahbawmh hna. Kahdohnak kong he pehtlai in mizapi vengtu ralkap phu lei nih cathanh chuah mi a um rih lo.
Kahdohnak a chuahnak hmunhma cu SAC ralkap hna nih minung thazaang chap ding in motor 4 he Kalaymyo in an kal hnawh, tiah khua mi nih an chim. Kahdohnak hmunhma pawng um mi Kung(ကုန်း) , Alay(အလယ်), Yuamah(ရွာမ), Myitta(မြစ်သား), Tasi(သာစည်), Yinhlah(ယင်းလှ) le Hnankha(နှမ်းခါး) khua in mizapi cu ramlak ah an zaam hna, tiah theih a si. Credit; The Chin Post
Korea President thar ding ah an thim mi Yoon Suk Yeol nih cun caan saupi an zulh pengmi phung hrawk colh in President inn ‘Blue House’ cu Defense Ministry umnak hmun ah kan ṭhial lai, tiah March 20 ah a chim. Hi ‘Blue House’ ṭhialnak ah hin USD 40 millions tluk a dih ding a si.
March 9 i tuah mi S. Korea President thimnak ah teinak a cotu Yoon Suk Yeol nih cun a office ding cu a ṭhial a timh nain Seol khua chung i a ummi President inn ‘Blue House’ tu cu mipi caah onpiak an si lai, tiah a chim. President inn lawng si loin anmah umnak quarter zong Ambassador hna an umnak veng chung ah ka ṭhial lai, tiah March 20 ah a chim chih.
YaungSan ah a um mi Defense Ministry Headquarter cu a hlan i US ralkap camp hlun he i tlai in a um mi a si i, hi hmun hi Rampi Runvennak hmunpi a si pinah security ca le zeidang kong ah a tlamtlin cia caah President inn ‘Blue House’ zong ṭhial ka timhnak a si, tiah S. Korea President thar si ding mi Mr. Yoon nih cun a chim. TCP
