Sagain Ramthen Ah Ralhrang Nih Raltuk Nak Vanlawng Hmangin Bomb An Thlak
Sagaing ramṭhen, Yeoo peng, Taungpyinngae khua pawng ah mipi vengtu ralkap le ralhrang kar kahdohnak um lo nain ralhrang nih nihinh chung pehzulh in helicopter hmang in bomb an thlak hnu ah ralhrang tampi a chiah hna, tiah khua mi nih Yangon Khat Thit Media ah an chim. “kahdohnak cu a um lo nain nizan zanlei zong ah helicopter a rak zuang i bomb a thlak.
Bomb hi voi Voi nga hrawng an thlak i cu hnu ah helicopter dang pakhat a rak zuang i ralhrang pawl a rak chiah hna. Taungpyinngae khua pawng um mi khua vialte zong an zaam dih cang. Zei ruangah atu bantuk hin an tuah zong fiangin kan thei kho lo,” tiah khua mi pakhat nih cun a chim.
February 6 zingka suimilam 11:45 zong ah Yeoo peng, Taungpyinngae khua, Aungyetwin khua le Paluzawa(ပလူဇာဝ) khua pawng hrawng ah helicopter in M-35 an thlakhnawh hna, tiah theih a si. Helicopters in ralhrang pawl an rak chiahnak hmun cu Minkin, Kani, Yeoo, le Depaewin peng pawl aa tonnak hmun a si. Ralhrang pawl a chiatu Helicopters hi paruk an si, tiah khua mi hna nih cun an chim.
Helicopters in an rak chiah mi hna ralhrang hi 70 hrawng an si i nizan zanlei ah Taungpyinngae khua cu an luhhnawh hna i, inn zeimawzat an hrawh hnu ah phungki sianginn ah umhmun an khuar, mipi cheukhat zong an tlaih hna i an hrem hna, tiah theih a si. The Chin Post
“Combodia Prime Minister Hun Sen nawknak ruangah ralhrang nih an tlaih mi Australia rammi Professor Dr. Sean Turnell cu Nizan, Febuary 6 ah an thlah ṭhan cang, tiah theih a si. Australia ram mi Economic thiamsang Dr. Sean Turnell cu ralhrang nih tlaih mi Daw Aung San Suu Kyi nih a hruai mi NLD Cozah chan ah Economic lei ah Daw Suh ruahnak petu a si i, ralhrang nih ‘rampi phunghram na buar’ ti in sualphawt in an tlaih i kum 14 thong tla ding a si.
Australia Cozah nih Combodia Prime Minister Hun Sen sin in SAC ralhrang sin ah nawlnak bia an cah caah kumkhat chung an tlaih cang mi Dr. Sean Turnell cu an thlah ṭhan i, January 7 i Hun Sen le Min Aung Hlaing tonnak an ngeih lio ah Hun Sen nih Dr. Sean Turnell thlah ding ah Australia cozah biacah cu a chim i Min Aung Hlaing nih cohlanpiak in ‘a thlah lai’ tiah bia a rak kamh i, nizan february ahkhan luatnak a pek,” tiah Mizzima thawngzamh nih a ṭial mi kong ah VOA nih SAC ralhrang biachimnak nawl ngeitu Zaw Min Htun an hal tikah ‘thawngdeu a si, a dik lo’ tiah a leh hna. The Chin Post
