Press "Enter" to skip to content

Salai Lung Thli Tum Nih CDF Kong Hen Pehtlai In A Chimmi Hi A Dik Tuk

CDF Miphun nih tihmi ralkap nan si nak hnga lo CDF min hmang in pumpak caah phaisa a kholh’ tiah CDF Thantlang nih Bungtlang khuami pakhat an tlaih i an rak thah. Ho hmanh nih zapi theih in an rak phuang ngam lo, a rak dai beh.

Minung thah hi a fawi ngai ko hi ta, hriamnam kan ngei cang ko caah minung kan thah zong ah hohmanh nih an kan ti ngam lai lo, dantat kan tong lai lo timi tihnung ruahnak hi Bungtlang pa an thah ni thawk in CDF ralkap cheukhat lungthin ah i sem hram thawk dawh asi.

Tlawmpal ah zohchia taktak in Mara pa an thah rih. Dantat um loin an hruaitu hna nih cathanh an chuah i kan ralkap nih an thahmi a si lo tiah an sualnak an thuh piak hna. Tlerh an hun ton hnu ah sia an thah i a thli tein ‘kanmah thah sualmi a si ko’ tiah an va nawl than hna kha a si. Nain, sualnak a tuahtu ralkap dantat an tong hlei lo.

Pu Mangcin zong Council biaceih hmasa loin CDF Hakha ralkap cheukhat nih an thah. An sual ko nain lainawngtu dantat a um lo, hruaitu hna nih ‘kan ralkap an palh lo, Pu Mang Cin cu dalan a si tiah kan fehter kho lo nain dalan a si kan zumh caah an thah’ tiah an chim.

Zahan ah sualnak ngeilo Pu Biakceu an thah ve. Ralkap phung zulh loin meithal puah a hmang i nunnak tiang a latu kha dan an tat ve hnga maw? Dantat a um lo ahcun kan miphun caah tihnung ngai asi te lai.

Kawl ralkap nih mi sawh2 an thah tawn, dantat a um lo. An lor chin. An sualnak phuan piak an duh lo, a phuangtu cu ‘kan in tlaih hna lai’ tiah an tlerh tawn hna. Keimah lila zong nih atuletu in an sualnak ka tial ve tawn. Hiti an sual ruang ah ralhrang tiah kan auh hna i kan unau tampi nih meithal in nan doh hna khi a si.

Kan miphun ralkap cu MAH ralkap bantuk lungput ngei hram hlah u, phung a zul i miphun nih bochanmi ralkap si khawh i zuam hram u. Miphun nih tihmi ralkap nan si nak hnga lo sualnak a tuahtu nan ralkap cu an phut ning in dantat ve cang uh. Crd; Salai Lung Thli Tum.

Be First to Comment

Leave a Reply

Your email address will not be published.