Press "Enter" to skip to content

Saw Le Kanpalet Karlak Ah Tuzing Ah Fak Tuk In An I Kap

Maggui ramthen Saw peng chung Sue Lue Chin khua le Chin ramkulh Kanpalet peng chung Ma Sa Tui khua karlak ah CDF-Kanpalet le SAC ralhrang ralkap karlak ah Febuary 28 zinglei sml 8:30 in zanlei sml 4:00 tiang fak taktakin an i kap tiah theih a si.

SAC ralhrang ralkap leikap ah a tlawmbik 10 hrawng an thih pinah tam taktak nih hliam an tuar.SAC ralhrang ralkap nih a thimi an hawile ruak cu lamkam thlam pakhat ah an khawmhsuat hna hnuah a thlam he mei an khangh chih.Cupinah lamkam ah a ummi thinghnah tibantuk hna zong mei an khangh viar.

CDF-Kanpalet i pyauh kyar kahdohnak a tongtu SAC ralhrang ralkap motor rual cu cuka Sui Lue Chin khua le Ma Sa Tui khua karlak ah zaan an riak rih men lai tiah ruah damh an si.CDF-Kanpalet le anmah bawmtu Laung Syi PDF leikap ah hliam tuartu umloin an i zukphiak kho tiah theih a si.Pehzulh in kahdohnak hi a chuah kho rih caah nulepa hna nih thawngthanhnak kan tuahmi paoh cu rak kan zulhpiak hram u, tiah an langhter tiin Zalen nih a tial.

Monywa In SAC ralhrang ralkap i VIP vanlawng pakhat cu Febuary 28 zinglei caan ah Kalaymyo vanlawng tual ah a tum tiah theih a si.Cu VIP vanlawng cu ralhrang ralkap bawi ngan deuhdeuh khual tlawnnak ah an hman tawnmi vanlawng hme deuh a si tiah theih a si i, Kalaymyo ralkap chungkhar an kalpi tiah theih a si.
Nizan zongah Chin ramkulh Hakha, Rih Khua Dar, Falam ah ralkap helikopter pakhat cu a tum i, eidin ti rawl asiloah hriamnam a phormi a si lai tiah theih a si.

Be First to Comment

Leave a Reply

Your email address will not be published.