Shan ramkulh, chaklei Nankham Khuapi Chung Market(dawr) Chung Tiang Tn Ta’ang National Liberation Army (TNLA) Ralkap Pawl An luh Cang Caah Khuapi Chung Ah Kahdohnak A chuak Lai
Shan ramkulh, chaklei Nankham khuapi chung market(dawr) chung tiang in Ta’ang National Liberation Army (TNLA) ralkap pawl an luh caah khuapi chung kahdohnak a chuak lai, tiah mizapi thinphang ngai in an um.Nihin Febuary 4, zinglei suimilam 9:00 hrawng ah Talawng hriamtlai phu TNLA ralkap tampi cu Nankham khuapi chung ah an lut i market chung tiang an luh cang caah kahdohnak a chuak lai, tiah an thinphang i dawr zong an khar dih i dawr ngeitu hna cu inn ah an lawi dih, tiah dawr kam i a um mi tualchung mi pakhat nih a chim.
TNLA ralkap pawl hi zeiruang ah dawr chung ah an luh ti mi belte hngalh khawh a si rih lo. Kan hnu January 5 zong ah khan Nankham khua chung ah TNLA le ralhrang karlak kahdohnak faak ngai a rak chuak.
RAMCHUNG THAWNG: Mizapi Himnak Ding Caah AYA Bank Bomb Puah Ding Kan Ṭhulh Tiah BFRAF Nih Thanh; CDM pawl hrocer le hnahnawhnak a pe lengmangtu, Kanna lam ah ummi AYA bank ralrin peknak ding caah bomb puah timh a si nain mizapi himnak kong zawnruah ah kan ṭhulh ṭhan tiah “Burma Final Revolution Armed Force” phu nih cathanh an chuah.
Febuary 4 zing slm 6:00 hrawng ah Yangon, Alone peng Kanna lam ah ummi AYA bank a tha a ṭhawng ngai mi bomb kan kamh, nain bank pawng ah mi choklet ṭhing loin an um peng caah kan ṭhulh ṭhan tiah an cathanh ah cun a ṭial chih. Hi AYA bank nih hin CDM tuahtu hna cu Phaisa cawi mi a karh santer, Tlaiman liamter ding ti bantuk in, phunkip in hnahnawhnak an pek hna, tiah BFRAF nih cun an thanh chih.
Hi bantuk in CDM tuahtu cung ah nan cawlcanghnak hi ralhrang tuahsernak cohlan bantuk a si ca ah rakrin kan in pek hnu hna in CDM tuahtu hna cung ah nan tuahsernak nan ṭhinh lo ahcun bank rianṭuantu vialte cu Black list ah chiah nan si lai i a herh ning in ṭuanvo kan laak lai, tiah an ṭial chih fawn. BFRAF nihhin February 1 zong ah Yangon, Taketah khuapi chung ah lam onnak puai ah a rak rami rakhrang bawi pawl cu bomb puahhnawh an rak timh cang hna, nain mizapi choklet an tam tuk caah mizapi hliam khuai ding an duh lo i an rak ṭhulh bal cang.
