Silent Strike Ah I Tel Lo Ding In Min An Thutter Hna!

A ra lai mi february 1, ralhrang uknak duh lo ‘Silent Strike’ langhternak ah dawr khar lo ding in ralhrang nih minthutternak an tuah, tiah min a thutu dawr ngeitu cheukhat nih Than Lwin Times ah an chim. Ralhrang fial mi Sangchung inn 10 ukbawi le inn 100 uk bawi hna cu dawrkip ah lut in, dawr khar in silent strike ah i tel lo ding in min an thutter hna. Silent strike nan tuah ahcun dantat nan si lai. Nawl kan chuah mi vialte hi nan zulh lai, tiah an ti hna.

Cu pin ah Moehdone Swe Hinthar dawr hna zong ah ralhrang kuttang Sipin rianṭuantu hna nih an hro hna i min an thutter hna, tiah theih a si. Moehdone khuapi cu a hlan in tuah mi ‘Silent Strike’ ah khuapi chung mipi dihlak i tel in duhlonak an rak langhter cang, tiah theih a si. Silent Strike in duhlonak langhter ni a phak tikah dawr nan khar a si ahcun tlaih nan si lai i nan dawr cu chuh nan si lai, tiah nifatin loud speaker in an au, tiah khua mi pakhat nih a chim.

Ralhrang phu hna nih Mawlar Myiang khuapi, Kyauk Ma Yaw (ကြိုက်မရော), Kyaukthu ( ကြိုက်ထို), Thatung (သထုံ) khuapi hna zongah dai tein duhlonak langhternak cu tuah lo ding! nan tuah ahcun dantat nan si lai, tiah hronak pehzulh in an tuah tiah theih a si. Nawlngeihnak a latu ralhrang hna nih sualnak ngei lo mipi cu in an thah peng rih hna. Nihin tiang ah minung 1500 hrawng an thah cang hna i mipi inn le lo tampi an khanghpiak hna lengah an tlaih fawn hna, tiah Than Lwin Times nih a ṭial