Sithar Khua SAC Ralkap Nih Hriamngan An Kah Caah Inn 20 Leng A Rawk

Shweku Peng Ah SAC Ralkap Nih Hriamngan An Kah Caah Inn 20 Leng A Rawk, Kachin ramkulh, Shweku peng Sithar khua ah SAC ralkap nih Jet Fighter le hriamngan in kahdohnak an tuah caah Sithar sii-inn le sianginn telh in inn 20 leng a rawk, tiah Shweku PDF in ṭuanvo ngeitu pakhat nih a chim.

Nizan April ni 5, chun suimilam 12:00 hrawng ah SAC ralkap nih, Sithar khua ah Fighter 2 nih bomb 3 an thlak pin ah 82mm hriamngan in an kah caah inn 20 leng a rawk, tiah theih a si.

“Sii-inn mizaw khan cu zatuak 80 tluk a rawk. Zung rianṭuantu an umnak inn lawng a taang. Cu pin ah sianginn thlalang hna zong an kuai dih. Sithar khua inn 20 leng a kang i Manna khua inn 2 zong a rawk,” tiah Shweku PDF in ṭuanvo ngeitu nih cun a chim.

SAC ralkap tatma 88 kuttang Khah Lah Yah 10, 77 le 88 in thazaang chapmi ralkap hna cu Minghwungyi khua ah umhmun an khuar rih. Hriamngan le Fighter hmang in SAC ralkap nih, kahdohnak an tuah caah Sithar le Manna khuami hna cu ral an hrial tiah theih a si.

Pathein Peng NLD Zung SAC Ralkap Nih An Hrawh, Mandalay ramṭhen, Pathein peng NLD zung cu SAC ralkap nih uniform hruk loin mi sawhsawh bantukin an va hrawh i, Bogyoke Aung San le Suh Kyi zuk(poster) zong an thleh dih, tiah NLD nih an langhter.

April ni 5, zan suimilam 11:30 hrawng ah SAC ralkap uniform aa hrukmi le uniform aa hruk lomi hna nih Pathein peng NLD central zung cu an hrawh i, zanlai suimilam 1:00 hrawng lawng ah an ṭin ṭhan. Zung chung thilri a rawkmi a um le um lo cu kan hngal rih lo, tiah an langhter.

“Zan suimilam 11:00 hrawng ah uniform i hruk loin an lut i kan zung cu an hrawh dih. Zung thlalangawng zong an khuai pin ah Bogyoke Aung San le Suh Kyi zuk kan tarmi zong an hrawh,” tiah NLD party mino phu nih an langhter.

SAC ralkap nih March thla dongh lei ah NLD le SNLD party telh in party 40 cu ramkhel party sinak in an rak hrawh hnu ah Yangon le Mandalay ramṭhen ah NLD zung signboard cu SAC ralkap nih an hrawh hna, tiah theih a si.

Leave a Reply

Your email address will not be published. Required fields are marked *