Taingen Khua Pawng Ah SAC Ralkap Le CDM Siyin Kar Kahdohnak A Chuak
Taingen Khua Pawng Ah SAC Ralkap Le CDM Siyin Kar Kahdohnak A Chuak. Chin ramkulh, Tedim peng, Kalay-Taingen lam hmun pakhat ah SAC ralkap le CDM Siyin ralkap cu nihin April 24 zing suimilam 8:00 tluk ah an i kap, tiah theih a si.
April 18 lioah Kalay in Chinram lei a kaimi SAC ralkap leilawng 4 cu Tedim peng Kenedy tlang in an ṭum i, an kirlei ah atu bantuk in kahdohnak a chuak, tiah theih a si. Nihin zing suimilam 10:30 tiang Kalay in hriamngan 120mm voi 7 hrawng Taingen lei hoih ah an kah, tiah theih a si.
Kalaymyo in a rak kaimi khualtlawng leilawng zong SAC ralkap nih an dirter i, khualtlawng mi hna cu ralphaw hman dingah an tlaih hna. Chinram in Kalaymyo lei a ṭummi lelawng hna zong Taingen khua pawng ah an taap, tiah theih a si. The Chin Post
Sagaing ramṭhen, Kanbalu peng, Pazigyi khua pawng Laydwinsin khua ah April 22 ah khan kahdohnak a chuak i, SAC ralkap 25 nak tlawm lo an thi. PDF ralkap 1 hliamhma a pu ve, tiah Kanbalu peng Malay hmunram Pah Kah Phah in ṭuanvo ngeitu nih nihin April 24 ah a chim.
“April 22 ah SAC ralkap nih, Pazigyi khua ah bomb an thlak hnu in chunnitlak kahdohnak a chuak. Bomb in kan puahhnawh hna i hmaitonh zong in kan i kap. SAC ralkap a thimi hna cu Eucalyptus thingkung tang ah mei in an khangh hna,” tiah Kanbalu peng Pah Kah Phah in ṭuanvo ngeitu nih cun a chim.
Laydwinsin khua cu Pazigyi khua in meng khat tluk aa hlatnak ah a ummi a si i, April 11 lio SAC ralkap nih Pazigyi khua bomb an rak thlak tan ahkhan Laydwinsin khuami pa 4 zong an nunnak a rak liam ve. Laydwinsin khua kahdohnak a daih hnu in SAC ralkap nih khua cu mei in an khangh i tualchung mi 16 zong an tlaih hna, tiah theih a si.
SAC ralkap nih, April 11 ah Pazigyi khua cu bomb in an rak thlak ruangah tualchung mi 168 an nunnak a rak liam pinah April 20 zinglei ah Pazigyi khua le pawngkam cu Fighter in bomb voi 2 an thlak chap ruangah khuate 7 in khuami hna cu ralhrial in an zam, tiah theih a si.
