Press "Enter" to skip to content

Tamu Khuapi, India Ramri Ah Kahdohnak Fak Tuk In A Chuah Hnu ah Mei A Kaang!

Sagaing ramthen Tamu khuapi, India le Kawlram ramri Bar Aye gate ah umnak sakhan tuahtu nawlngeihnak latu SAC ralhrang ralkap le mipi vengtu hriamtlaimi karlak ah Febuary (11) zanlei sang sml 5:30 hrawng thawkin an i kap tiah thawng theih a si.

Tamu ah a ummi pakhat nih cun “Cuka Bar Aye Pauh ah a ummi nawlngeihnak latu SAC ralhrang ralkap hna nih India ram ah thilri phortu hna cu phaisa an hal hna. Ramri gate a si tikah India ralkap an um lo karah atu bantukin kahdohnak a chuah hi a si.

Meithal puah thawng an theih levangka in Nan Pha Lung ah a ummi SAC ralhrang ralkap hna nih an zuan hnawh colh hna i, kahdohnak caan hi a sau pah ko. Kahdohnak a daih hnu tlawmpal ah Nan Pha Lung i thilri chiahnak inn pakhat cu mei nih a kang. SAC ralhrang ralkap leikap ah (3) an thi tiah an chim nain fehter awk a tha lo” tiah a chim tiin Zalen nih a tial.

THAWNGDANG..Febuary (12) Cu Internet Phih A Si Lai Tiah Thawngpang A Chuak!
Febuary 12 zinglei sml 4:00 in internet phih a si lai tiah thawngpang a chuak. Asinain mipi nih cun SAC ralhrang nih an chuahmi channel paohpaoh zoh lo dingin timhtuahnak an ngei tiah theih a si.Febuary 12 zinglei sml 4:00 -Zaan sml 11:00 tiang internet phih dih a si lai tiah Febuary 11 zaan ah thawngpang a chuak.


Hi thawngpang hi a dik ko ahcun SAC ralhrang ralkap nih an tuahmi upat peknak puai cu mipi nih channel hmangin zoh hna seh timi saduhthahnak ruangah internet phih aa timhnak a si lai tiah an ruah cio.Internet phih ruangah TV channel zoh chan a si ti lo, U Nay Win chan ah maw a ruah hnga tiah Tamui ah a ummi pakhat nih a chim.

Mipi cheukhat nih cun internet a phih le phih lo cu a biapi lo, thanhtar le au thawng lawng ngaih ding a si ko tiah an ti.Febuary (12) ah duhlonak langhtertu phu nih thanhtar le au thawng rak ngai cio u tiah an forh. Internet cungin cun zeitindah au thawng cu nan ngaih khawh lai, tuah taktak nan duh ahcun lengah chuak hratin tuah ding a si ko tiah Yangon ah a ummi mino pakhat nih a chim.
Febuary (12) ah mipi hna i au thawng le thanhtar hna cuanh pah in lamzawhnak an tuah ahcun telpi cio dingin forhfialnak tampi hmuh khawh a si.

Be First to Comment

Leave a Reply

Your email address will not be published.