Press "Enter" to skip to content

Thantlang Ralhrang Sakhan (bungkung ) pawng ah kan tarh mi Bom cu Tuni ah Ralhrang pawl nih an i pal sual caah Bom 2 apuak

Thantlang Ralhrang Sakhan (bungkung ) pawng ah kan tarh mi Bom cu Tuni ah Ralhrang pawl nih an i pal sual caah Bom 2 apuak .an hrum ai thawng, an i cerhro thawng kan hei theih khawh hna. Pahnih thum cu an fak ngai la tiah kn zumh Credit-Salai Phuntanh

thawngpang dang relchap : Oct 19, Nikhat Chung Thawngpang Biapi Deuh Hna

Insein thonginn in a nihnihnak thongtla an chuah than cang hna: Yangon khuachung Insein thonginn hmaiah October 19, tuni luatnak a hmumi hna chungin Mizzima dirhtu Ma Tin Tin Aung telh in luatnak a hmutu hna cu chungkhar cio le mipi hna nih zinglei ah an don hna.

Nihnih nak ni caah nihin October 19, zinglei suimilam 8:00 in thlahhram an thok i suimilam 11:00 hrawng tiangah thongtla nu phortu motor pakhat le pa phortu pakhat cu thlah an si cang tiah cu ka hmunah ummi hna nih cun an chim.

Hramhram nawlngeihnak latu ralhrang hna kut in tlaihkhih a tong i thongtla mi hi mi ung 1316 le tazacuai a tong mi minung 4320 cu thlah an si canglai tiah thawng thanhnak a um hnu ah a tu bantuk in mipi le chungkhar hna nih donnak he an hngah cio nak hi a si.

October 18 zaanlei thok in ramchung ah phungninglo in tlaihkhih a tong mi NLD party chungtel le media lei riantuan tu hna telhin ramkhel ruangah tlaihkhih a tong mi hna cu an thlah than cang hna tiah Mizzima nih a tial.

Motor gate in kahdohnak a chuahnak hmun ah sii-ai phorhnak nawl an kham: Yangon khualeng chuahnak gate in hmunkip cio ah thilphortu ding motor hna cu checkhlatnak thatuk in an tuah i Chin ramkulh, Sagaing ramthen le Magway ramthen hna ah sii-ai phorhnak nawl an kham.

Yangon ramthen chung ah Awngmingala gate le Dagon Aya gate chungin hmunkip cio kuat ding parcel thil hna cu cu an on i cheknak an tuah. cun kahdohnak a chuahnak hmunhma le Chin ramkulh, Sagaing ramthen le Magway ramthen lei kuatding thilri chungah sii-ai a tel ahcun gate nih an cohlang lo.

Thil kuatu pakhat nih cun “Thilkuat ka chiah ah, na thil kan phoh lai, kan zoh ta lai an ti, an phohnak zong thaten phihnak an tuah than lo, lampi zong ah hmunli hrawng an checknak an tuah, sii-ai aa tel ahcun nan thil a phaknak ding tiang tuanvo kan la lo an ti, lampi checknak ah sii-ai aa tel ah cun kan cohlang lo tiah gate nih an kan ti” tiah a chim.

Mindat khuami pakhat nih cun “Mindat ah sii kuat ka duh na in a ngahlo an kan ti, cu hlan ah cun Pakokko gate in Mindat ah kuat khawh a si. Atu ah cun Poh peng khuachuahnak gate ah checkhlat nak thatuk in an tuah, thilri an on dih lengah sii-ai a si ah cun a tlawm zong ah a tam zong ah an cohlang duh lo, CDF,PDF sinah cu sii-ai hna cu an kuat lai ti ruahnak in sii-ai aa tel ah cun an lak dih” tiah a chim.

Atu lio Chin ramkulh chungah sii-ai phorh ahcun sii zuarnak license, khuabawi lungtlinpinak ca le SAC ralhrang lungtlinpi nak tel lawng ah sii-ai phorhnak nawl an onh hna tiah Mizzima nih a tial.

Thongtla hna thlahnak thawngin nawlngeihnak lakmi a dih cang lai tinak a si lo: Nawlngeihnak latu ralhrang hna nih thongtla hna luatnak ka pek hna lai tiah thawngzamhnak a tuah mi cu ramkip nih zei an rellonak zorter dingah a hmanmi hmanrua phunkhat lawng a si, cu bantuk in thongtla hna a thlahnak thawng in hramhram a thiltuah mi le nawlngeihnak a lak mi kong ah ngol a tim lai lo tiah ramchung thongtla hna zohkhenh bawmchantu phu AAPP nih a langhter.

Luatnak pek an si hnu ah thonginn in a chuakmi hna chung ah cheukhat cu tlaihkhih an tong than mi zong an um tiah theih a si. Rampi ruahnak pe tu Daw Aung San Suh Kyi le president U Win Myint tel in tlaihkhih a tongmi ramkhel thongtla hna cu him ten chuah ding le anmah an rian tlaih mi cio ah tuannak pek an lai AAPP nih a langter.

Cun hramhram in hrem le tukvelh a tongmi hna, sualphawt in phungning lo tlaihkhih a tong mi hna le pumsa tuk velh le lungthin lei tiang damlo in an tuahmi hna cungah ngaihthiam halnak le an dam tiang tuanvo an lak lai tiah a chim chih.

AAPP nih cazin an khomhsuat ningah February 1 thok in October 18 tiangah tlaihkhih a tongmi hna dihlak hi 7355 an si i cu chung ah cun minung 354 hi thongtlak dingin an bia ceih piak mi hna an si tiah The Irrawaddy nih a tial.

Hneknak ruangah ralhrangbu nih ramkhel thongtla hna cu an thlah than hna tiah Tom Andrew nih a chim: Myanmar ram chungah ralhrang nih hramhram nawlngeihnak an lak hnuah tlaihkhih a tongmi, thongtla mi hna le case ceih piak mi hna cu ralhrangbu nih luatnak a pek than mi hna hi ramchung ramleng in hneknak (presureness) peknak ruangah a si tiah Myanmar nuhrin covo lei tuanvo ngeitu UN palai Tom Andrews nih a chim.

Nawlngeihnak lak hnuah tlaihkhih a tongmi ramkhel thongtla chungin minung 5000 leng cu ralhrang nih a thlah than hna cu a thatuk na in, hi hna ralhrang bu nih hin anmah nih nuhrin covo nawlngeihnak hmangin phungning lo in tlaihkhihnak an tuahmi hi an philhlo ding ah biapi mi a si tiah a chim.

Kap khatlei ah ralhrang nih an lungthin an i thlen caah thongtla hna cu an thlah hna si lo in ramchung ramleng in hneknak ruangah atu bantuk in thongtla a thlah hna nak hi a si tiah a chimchih.

A tu ah ralhrang phu hna nih 1)phaisa, 2) hriamnam, 3)phungning sinak tiah phunthum hna cu ramkip sinin hmuh dingah aa zuam cuahmah lio a si i thladih lei ah tuahding mi Asian tonpumh biaruahnak ah SAC ralhrang hruaitu cu sawmlo ding in biakhiahnak an tuah.

Ramkip cio nih ralhrang sin ah hneknak an tuah rih ko a si ahcun, Myanmar mipi hna caah bawmhchanhnak pek a si i, mipi hna caah nuhrin covo runvenpiak zong a si tiah a chim.

Kyautgyi(ကျောက်ကြီး) kahdohnak ah ralhrang lei bohmu tel in 7 an thi, 5 hliam an tuar: Pago ramthen, Ngawnglaypin(ညောင်လေးပင်) pengkomh, Kyautgyi (ကျောက်ကြီး) peng ah Kayin ralkap(KNDO) le ralhrang kahdohnak a chuak i ralhrang lei bohmu pakhat tel in minung 7 an thi, 5 nih hliam an tuar tiah October 18 ni ah KNU nih thawngthanhnak ah a langhter.

October 14 ni ah KNDO battalion 3 hmunhma chungah lutmi ralhrang ခမရ-559,ခမရ-590 battalion in cawlcanghnak a ngeimi ralhrang hna he kahdohnak voi 3 tiang a chuak.

Mute(မူသယ်) khuami pakhat nih “SAC ralhrang hna cu hmunhma ri lonh in an luh caah kahdohnak a chuah hi a si. Kahdohnak a chuah paoh ah ralhrang nih khuachung ah hriamngan le hriamhme hmang in an kah leng ah an hmuhmi hna poh an tlaih hna caah tlik zaam a hau, a tu kahdohnak zong ah ralhrang phu lei in a thi mi le hliamhma tuar an um len ko” tiah a chim.

Ralhrang hna minung 160 hrawng cu brigade 5 hmunhma lei ah hmunhma ri lonh ding in Ngawnglaypin(ညောင်လေးပင်) pengkomh, Kyautgyi (ကျောက်ကြီး)peng Mute(မူသယ်) khua ah October 13 ni ah an phanh hi a si tiah KNU cathanh nak ah an langhter.

A luan cia ni tlawmpal ah khan KNU brigade 3 hmunhma ah ralhrang minung thazaang 200 hrawng nih hmunhma ri lonh in thazaang chap nak an tuah caah kaphnihkar kahdohnak a chuah hi a si.

September 22 in 24 tiang nithum chung ah KNU brigade 3 in battalion 9 hmunhma ah ralhrang he kahdohnak voi 9 a chuak, ralhrang lei in a thi mi an tam caah September 25 ni ah ralhrang hna cu hnu an tolh tiah KNU nih cathanh an chuahmi ah an langhter. DVB

Ralhrang nih riahcaw le thilri phorh ah an kaltawn lampi Gonbu(ဂုံဘို) hleidonh cu tilian nih a lak caah a rawk: Ralhrang hna nih Kachin ramkulh anmah ralhrang phu sinah eiding riahcaw phorh in an kal tawnnak lam Gonbu (ဂုံဘို) hleidonh cu tilian nih a lak caah motor lampi cu chikhat a pihnak hi a si.

Ruahpi faktuk in catlo a sur caah tiva hna cu an lian i Chin ramkulh Mindat le Magway ramthen Pakokko khua a bik in umkalnak ah hman mi Kyautthuh le Pansan kar ah ummi Gonbu (ဂုံဘို) hleidonh cu ti nih a ei caah a cat.

Cuka pawng a ummi khuami pakhat “Ni zaan tiang ruah pehtlai in a sur , tiva kam ah ummi meitung hna zong ti nih a ei i a cimhpi, cuka khuapawng ummi hna zong an mei a mit, minung umkalnak tha ding in thirhri in tuah a si lai, a tu ah cun tiva in khatlei ral kal duh ah cun motor kee(ဘောကွင်း) in kal a si” tiah a chim.

Gonbu (ဂုံဘို) hleidonh cu Chin ramkulh Mindat le Mandalay, Pakokko khua pehtlaihnak ah hmanbik mi hleidonh pakhat a si Mizzima nih a tial. Myeik Khuapi Ah Ralhrang Thawng Petu Pakhat Meithal Kah A Tong: Taninthari ramthen, Meik pengah ralhrang thawngpang petu Htein Lyn tiah auhmi U Thein Win cu nihin Oct 19, zinglei sml 8:00 hrawngah meithal in an kah i a thi tiah tiah khuami nih an chim.

Ralhrang thawngpang U Thein Win cu Khuapi Thar Aungsan lam le U Myiat lamtonak, Maung Tu computer catialnak dawr hmaiah meithal in kah a si tiah MPDF chungtel biachimnak nawlngeitu Bo Lyn Yaung nih a chim.

Ralhrang thawngpang petu U Htein Lyn cu mino hna tlaih an tonnak hnga ralhrang sinah thawngpang a pek hna pinah hriamnam bochan in mizapi hremnak le nehsawhnak a tuah ruangah kan thahnak a si tiah Bo Lyn Yaung nih cun a chim fawn.

Atu raldohnak caan chungah leirawitu Htein Lyn tiah auhmi U Thein Win nih ralhrang hna sinah thawngpang a pek ruangah sualnak ngeilo mi mizapi 50 leng tlaih an tong cang Than Lwin Khet nih a tial.

← Ralhrang Phu Motor 30 Leng Cu Tlangzar Khuachung Ah Lut In Ramthlo Khua Lei Ah Hriamngan In An Kah Hna

Be First to Comment

Leave a Reply

Your email address will not be published. Required fields are marked *