Press "Enter" to skip to content

Thawchuah Nai Harh Le Lung Zawtnak A Ngeimi Na Si Ah Cun, Hihi thei Le Hngalh Khawh I Zuam ve Na Ca Thatnak An Bawmh khawh lai…

Lung Zawtnak
==========================

Minung lung cu tangruh a tang i hnuk pahnih karlak zawn ah a um i keh lei kap hnuk he aa nai deuh. Hmanthlak chung kan hmuh bantuk khin lung cu thihri (thi kalnak lam) he aa peh i cu ti cun pum chung ummi organ dangdang le tisa (tissue) vialte sinah thi a kuat hna.

Cucaah lung a rian ngan bik cu pum chung ummi titsa vialte sinah tlamtling tein thi kuat khawh kha asi. Cu ve bantuk in thihri a rian ngan bik cu lung nih a kuatmi thi kalpi kha asi. Pum chung ummi titsa fate (cells and tissues) vialte cu thli (oxygen) tel loin rian an tuan kho lo pinah a nung zong an nung kho fawn lo. Cu titsa fa tete nih an herhmi thli cu thi (thisen tlang) nih a kalpi i a kuatmi hna asi. Cucaah lung nih thi a kuat tikah pum chung hmun dangdang lei a kuat hlan ah cuap (lungs) lei a kuat hmasa. Cuap chungah thli (hnar le kaa in kan dawpmi thli) cu a lak hmasa i thisen tlang nih lunglei a kirpi. Hitin thisen tlang cu thli he aa cawh ruangah thi a senmi khi asi, chim duhmi cu thli cawh lomi thi tlang cu a sen lo. Cucu zeitin dah a asi khawh ti kha lung a chunglei tlawmpal kan zoh hmanh lai. A tanglei hmanthlak hi hnulei le hmailei a lai zawn in cheumi lung hmanthlak asi.

Hmanthlak chung kan hmuh bantuk in lung cu orh le keh tiin khan 2 in aa dal. Orhlei kap khan cu thihri nganpi pahnih he aa peh. Thli (oxygen) tlamtling tein aa cawhmi cuaplei in a kirmi thi cu thihri pakhat lei in lungah a lut i khatlei thihri hmangin pumchung hmun dangdang lei (cuap tel loin) kha a kuat. Hitin thli he cawhmi thi cu pumchung dihlak kha a kuat i thli cu titsa hme tete (tissues) sinah a kuat i a kal tak. Cucaah thi chungah thli kha a zor than. Thli a tlawm tuk cangmi thi cu kehlei kap khan chungah thihri pakhat lei in a lut i khatlei thihri lei in a chuak than i cuap lei a kuat. Hika ah thi nih thli cu a lak than i orhlei kap khan chunglei cu a luhpi than. Cu ti cun lung nih cat loin pum chungah thihri sinin thi cu a herhningin a kuat chukcho lengmang. A tanglei hmanthlak hi lung nih pum chung dihlak thi a kuatning a langhter duhmi asi.

Hitin lung nih pum chung dihlak thi a kuat tikah lung cu aa reh aa samh than. Aa reh lioah thi cu lung in ongka pahnih (orhlei khan in pakhat cun kehlei khan in pakhat) lei in a chuak i a sam than lioah a dang ongka pahnih (orhlei khan ongka pakhat cun kehlei khan ongka pakhat) lei thi cu a lung chungah a lut than. Hitin aa reh aa sam thanmi kha “lungtur (heart beat or heart rate)” tiah kan timi khi asi. Upa a dammi a lungtur cu minute pakhat ah vawi 60 in 100 karlak asi awk asi.

“Thihri” hi a tlangpi in phunhnih in then khawh asi. Lungin a chuakmi thi a kalpitu thihri khi “artery” tiah auh asi, cun pum chung hmun dangdang in lunglei thi a kirpi than tu thihri cu “vein” tiah auh asi. Hi artery le vein hna an umnak le an hmetngan (sizes) zohchih in phun tampi in then chin le min pek than an si. Lungin a chuakmi artery nganpi cu pum chungah aa then chin lengmang i a donghnak ahcun thihri fate ah aa cang. Hi a donghnak a fa biknak zawn hi “capillary” tiah auh asi. Hika zawnah artery cu a dong i vein lei aa peh than. A tanglei hmanthlak kan hmuhmi bantuk khin.

Hika capillary timi zawn ahhin thi nih a kalpi mi thli cu thihri chungin a chuak i titsa chungah a lut i titsa caah rian a tuan. Thli long siloin hika capillary zawnah a lut/chuakmi thil dangdang tampi a um ve thiam. Ti (water) le carbon dioxide (CO2) tbk. hna zong thihri chungah an lut than ve i lunglei a kirpi hna, cun cuaplei a kuat i cuap nih hnar le kaa lei in a lengah a hlonh hna. A dangdang kong cu hika ah kan tel chih ti lai lo. Thi umtuning le a riantuannak kong tu ah a herh ahcun kan tial than te lai.

Crd: Net Siibawi

Be First to Comment

Leave a Reply

Your email address will not be published. Required fields are marked *