Press "Enter" to skip to content

Thawngchia: Malaysia Cozah Nih ‘Kanmah Tein Ralzaam Card Kan Ser Lai

Thawngchia: Malaysia cozah nih ‘kanmah tein ralzaam card kan ser lai, UNHCR nih ralzaam card peknak nawl a ngei lo’ ati. Kan hnu zarh ah Rohingya ralzaam pawl nih Malaysia thonginn (camp) an baoh caah Malaysia cozah a thinhung tuk. UNHCR nih ralzaam card a pekmi hna hi kan cohlang ti lai lo, kanmah cozah bak nih ralzaam card kan ser pek hna lai i mah lawng cu kan cohlan cang lai. UNHCR nih ralzaam card peknak nawl a ngei lo, ati.

“Phungninglo in Malaysia a lutmi pawl cu ralzaam ah cohlan ding an si lo. Passport he phungning tein a ra i ralzaam a sokmi Syria, Afganistan, tbk. pawl cu umnak nawl kan pek hna i kan tlai hna lo. “Nangmah theih loin na inn a hung baohmi cu na inn ah na umter lai maw? Nain nangmah theih tein na inn ah a ra i dornak a sokmi cu na umter ko lai,” tiah Ramchung Vuanci nih a chim.

Cucaah, tanglam in a rami pawl cu cozah nih hmuh ahcun tlaih viar ding le ralzaam card pek lo ding tinak asi i passport he phungning tein a ra i ralzaam a sokmi lawng pek ding tinak khi asi — cozah nih ralzaam card a ser tak ahcun Laimi caah a poi ngai te lai, nain mah thawngpang ruangah Malaysia kal i leet awk cu si lo, Malaysia cozah cu ralzaam rem lonak bia a chim pengmi si ko i lungrawh awk si leem lo.

A ser tak lai/lo zong hngalh asi rih lo i a va ser zongah a hlawhtling lo khomi si. Hi hlan zongah ralzaam caah card ka ser lai a ti tawn nain a hlawhtling tak bal lo. Malaysia cozah nih ralzaam card ka ser lai a timi hi ralzaam dawt si loin ralzaam le phungninglo ramdangmi fawi tein tlaih khawhnak caah asi deuh. Malaysia ahhin Chinmi 40,000 hrawng kan um. Mah chungah 22,700 lawng hi UNHCR card le catlap a ngeimi an si, tiah UNHCR nih 2022 March thla dongh ah a chim. Credit; Chin Express

Be First to Comment

Leave a Reply

Your email address will not be published.