Thawngfiang: Mizoram Aizawl Khuapi Ah Gas A Puak Minung 4 An Nunnak Liam
Aizawl Khuapi Durtlang veng ah Gas A Puak I Minung 4 An Thi!! Tuzing March 18, Suimilam 9 hlan deuh ah Mizoram khualipi, Aizawl khuapi Durtlang, Venglai road, Workshop ah Gas a puak i, Gas a puahka teah a hmun rianṭuan mi pahnih a nunnak a liam colh.
Hliam faak ngai a tuar mi midang pahnih cu siizung ah an kalpi hna nain tlawmpal ah an nunnak a liam colh ve, tiah kan bialaknak nih a chim. A pawngkam um mi hna chim ning ah Gas a puahnak Workshop inn hi aa ṭhek dih i, a pawngkam inn hna zong a tlirh dih caah thlalang a kuai mi le innchung thilri a rawk mi an um i, hliam hme a tuar mi zong an um, tiah theih a si. Credit; The Chin Post
Video hi zohkhawh Si!
SAC Nih Chin Ram Khuate Dihlak Covid-19 Raikhamsii Chunh Ding In Timhtuah! Chin ramchung khuate dihlak ah Covid raikhamsii chunh ding, tiah ceihhmainak cu SAC kuttang State Cozah zung meeting hall ah Hakha khuanu khuapa hna he ceihhmai a si, tiah Nizan March 17 zaanlei ah MRTV nih a langhter.
Cu meeting ah cun Pu Ngun San Aung nih, “A ra lai mi April thla dih ah Chin ram chung dihlak Covid raikhamsii chunh khawh ding kan i zuam i, kan Chin ram chung um mi khuate vialte ah pakhat hmanh bau lo tein Covid raikhamsii kan i chunh khawhnak ding ah Biaknak lei Upa hna le Volunteer hna nih bawmhchanh kan duh ko,” tiah a chim.
Hakha peng Mipi Zohkhenhnak Phu i Chairman Rev. Dr. Steven Lian Hup Ling le Rev. Denis Ngun Thawng Mang zong nih Covid raikhamsii kong ah an rianṭuan ning, an sining an chim lengah Hakha peng chung ah raikhamsii chunh ding ah rian ṭuanṭi an duh kong an chim ve, tiah theih a si.
Relchap; Aizawl Khuapi Ah Youth For Myanmar Nih Ralzaam Bawmhnak Caah Ei-din Zuarnak An Tuah! Myanmar ramchung buainak ruang ah Mizoram chung ah ralzaam in a phan mi hna bawmhnak ding caah Youth for Myanmar tawlrelnak in nihin March 18 ah a nikhatnak ei-din zuar in fund kawlnak ngeih a si.
Ralzam Bawmhnak ding caah ei-din zuarnak hi nihnih chung tuah a si lai i, zinglei suimilam 9:30 in zanlei 4:00 tiang tuah a si lai. Charity Concert zong tuah chih a si i, Chin Hlasak thiam Thun Thang, Biak Hlei Par, Iang Len Sung le hlasak thiam tampi zong nih an telpi hna.
Youth For Myanmar nih a luancia February 2 ni zong ah ralzaam bawmhnak ding ah Eidin zuarnak an rak ngei cang i, cutan an tuah mi ah India phaisa 60,000 renglo an rak hmuh i Mizoram hmunkip um ralzaam sin ah bawmhnak kan pek khawh hna, tiah Youth For Myanmar hruaitu Tluangte nih The Chin Post ah a chim. Hi ei-din zuarnak nawl a kan petu Aizawl DC cung ah le kan herhnaknak kip ah a kan bawmtu Central YMA hruaitu hna cung ah kan i lawm, tiah a chim chap. The Chin Post
