Breaking News! Homalin Peng Kahdohnak Ah SAC Ralkap Helicopter Tla Lak In Kahpiak An Tong, Pyusawhti Le SAC Ralkap 20 An Thi. Sagaing ramṭhen, Homalin peng Shwepyiaye Myotit pawng, nihin February ni 3, a cangmi kahdohnak ah SAC ralkap Helicopter pakhat kan kahthlak khawh tiah NUG nih cathanh a chuah.
SAC ralkap Helicopter pakhat cu tualchung hriamtlai phu PDF Hkamti pengkomh Battalion 1 Homanlin, HPDF 124, HPDF, HPDF Mokyu le ṭangṭi phufonh nih tla lak in an kah khawh tiah NUG runvennak lei vuanci nih a thanhmi ah a langhter.
Cu kahdohnak cu February ni 3, chunhnu suimilam 4:00PM hrawng ah a cang i, kahdohnak chung ah SAC ralkap le Pyusawhti 20 hrawng an thi. Tualchung hriamtlai phu lei in minung 2 nih ram le miphun ca ah an nunnak an pek tiah an thanhmi ah cun an langhter chih.
February ni 1 in February ni 3 tiang kaphnih kar fak ngaiin kahdohnak a chuak. Sagaing ramṭhen, Sagaing peng Tada Oo khua cu SAC ralkap nih luhhnawh in an kahdoh caah kum 6 tluk ngakchia pakhat a nunnak liam tiah tualchung mi nih an chim. Western News, the chin post
Relchap; SAC Nih Kan Ukpennak Hmun Tiah A Thanhmi Khin U Khuachung Ah SAC Ralkap Thah A Tong. SAC nih “Martial Law” in uk ding tiah thawngthanhnak a tuahmi chung ah aa tel vemi Sagaing ramṭhen, Khin U khuachung ah SAC ralkap kah a ton caah pakhat a thi, meithal pakhat kan laak khawh tiah tualchung hriamtlai phu nih an chim.
Nihin February ni 3, zinglei suimilam 10:00AM hrawng ah Khin U khuachung SAC ralkap sakhan pawng ah Motorcycle in a kalmi ralkap pakhat cu khuachung motor lampi ah tualchung hriamtlai phu nih an kah caah hmakhatte ah a thi tiah theih a si.
Khuachung motor lampi ah thah a tongmi SAC ralkap sin in G3 meithal pakhat, kuan bawm 1 le kuanfang 9 an laak khawh tiah theih a si. Cu hriamthil an laakmi cu Shwebo pengkomh No.2 Command Office ah an chiah tiah theih a si. SAC ralkap a dohtu hi Khin U peng pahkahphah le Phoenix pahkahphah UG phufonh an si. Khit Thit Media
2023 Ah Dohthlennak Dawnkhantu Hna Part (8 ) Pau Dohthlennak ah Ralhrang Dohnak Hi An Dong khawh Lai Maw: 2023 cu Pau Dohthlennak kan TEI kum le Ralhrang Cihmih kum ti cu va si kaw??? Ramdang le UN ah Legitimacy le pehtlaihnak ah kan hlawhtlin ko hmansehlaw, Harsatnak le sifah Retheihnak in mipi kan luat rih lo.
2023 thimhnak kan hrawk khawh ko zongah SPH le Tamada si awk ah MAL cu Lamdang in a rak kai ṭhan te lai. MAL le Ralhrang Rallokap an um lo hnu lawng ah mipi cu a luat ding kan si. Mipi zalonnak hmuhco awk ah fascist Rallokap a um lo lawngah asi khawh.
Cucaah Dohthlentu phu vilate nih hlan lio nakin / tu nakin lungrual deuh kan herh, pumkhat kan si deuh a herh. Kan i lungrual lo tuk lawmmam i kan i pumkhat khawh bak loh.
Ramdang bawmhnak cu mipi sinah tlawttlau lo tein kan hman thiam a herh ngai ve. Kan fir lo a herh ko. Lungrual lomi Dohthlentu phu vialte kan I lungrual can asi cang. Aa fonh cia mi le aa lungrual cia mi zong kan I pumkhat chin a herh. Lamhlat in thazang pektu vialte nih ral hmun ah aum mi hna he kan I lungkhat a herh, asi khawh ahcun a hmun ah kan um ve a herh cang.
Tlangcungmi nih kan zumh lomi cungah kawlte nih an kan theihthiam ngai a herh. Hlan lio an palh bantukin an palh ti lo a herh. An palh cia mi vialte cung ah ṭuanvo lak ngam le an kan nawlpat zong a herh ngai. Miphun thleidannak, Party thleidannak le miphun nautat nak, huatnak vialte kaltak a herh, kaltak lawng siloin a cihmih hrim a herh.
Dohthlennak teinak cu Kawlram in aa thawk cu a har ngai lai. Ramri le Tlangcungmi ram in Kawlrawn lei ah tiah TEI thluahmah ah Dohthlennak hi a hlawhtlin deuh men lai. Kawlrawn in TEINAK hmuh hmasat awkah a zeilei poah in a har ngai ko, Asi khawh nak lam a tlawm ngai ko. A um lo tluk khi asi ko.
1962 ah aa thawk mi Ralhrang phung doh awk ah le Cihmih awk ah Tutan bantukin, Canṭha kan hmuh bal rih lo. 1948 zalonnak kan hmuh in Pinglong biakam ning in Federal ramkomh Sersiam nak caah canṭha cu, tu bantukin kan rak hmuh bal lo. Tutan Pau Dohthlen can ah, Federal Democracy ram kan siam khawh lo ahcun, hmai lei ah kan siam khawh lai lo. Tutan bantukin mipi nih ral an tho lai ti kha amakhan khawh asi lo. By- JRT
Be First to Comment