Thawngpang Tha Taktak Si; SAC Ralbawi Captian Ngwe Zin Lakphak Ding Lio Mi An Kah Thah

Sagaing ramṭhen, Kalaymyo Taungthar sang ah February ni 13 zinglei ah lakphak a dingmi SAC ralbawi hlun Captian Ngwe Zin thah a tong, tiah theih a si.

February ni 13 zinglei suimilam 9:00AM ah Taungthar sang ah lakphak a dingmi SAC ralbawi hlun Ngwe Zin(kum 53) cu thah a tong i, a meithal zun 1, leilawng, kuankham angki, zen-kuan le a dangdang thilri zong an laakpiak. Anih hi kokek thilchuak le pawngkam zohkhenhnak zung ah Assistant Director rian a tlaitu a si, tiah theih a si.

“SAC ralbawi hlun Ngwe Zin cu Taungthar sang ah lakphak a ding i a ṭin lei ah Operation Mo Mo nih an thah. Operation Mo Mo phu cu Kalay khuachung ah a cawlcangmi an si,” tiah anmah he naihniam mi sin in theih a si.

Ralbawi hlun thah a ton hnu in SAC ralkap nih Kalay khuachung ah humhimnak an laak i chekhlatnak zong an tuah, tiah theih a si. Laknak; The chin post

Adang; Sagaing ramṭhen, Pale peng khuabawi zung hngak ding in a chuakmi SAC ralkap hna cu bomb puahhnawh in kahdoh an ton caah SAC ralkap 3 an thi tiah tualchung hriamtlai phu in ṭuanvo ngeitu pakhat nih a chim.

February ni 13, zanlei suimilam 4:00PM ah Pale khuachung khuabawi zung hnulei hngak ding in a chuakmi SAC ralkap hna cu bomb puahhnawh in kahdoh an tong, minung 3 an thih leng ah pakhat nih hliamhma a tuar tiah a chim.

“Nizan February ni 12, ah Salingyi khua in a rak chuakmi SAC ralkap an si. Nihin chun ah Pale an phan, zan ah khuabawi zung ah ralven ding in an chuah ah bomb kan puahhnawh hna.

Nunnak liammi mipi ralkap hna caah thisen leiba lehrulh kan cham a si. A hmun ah minung 3 an thi, pakhat nih hliamhma a tuar” tiah tualchung hriamtlai Daungnat phu in ṭuanvo ngeitu Pee nih a chim.

Nizan, February ni 12 ah Salingyi ah SAC ralkap nih tualchung hriamtlai phu hna cu an kahdoh hna caah PDF chungtel 7 an nunnak a liam, motor 3 an khanghpiak hna tiah theih a si. Khit Thit Media