Thawngpang Tha Tuk A Si: Chin Pasaltha Hna Nih SAC Ralkap Minung (6) An Thah Than Cang Hna
Matupi Peng Kahdohnak Ah SAC Ralkap 6 An Thi. Chin ramkulh, Matupi peng Matupi-Paletwa lampi mengtung 12 Tuisit khuachuah thlan hmun le Pantui lam ṭhennak ah nizan March ni 22, zinglei suimilam 6:50AM in 8:00AM tiang SAC ralkap le tualchung hriamtlai phu kar kahdohnak a chuak. Cu kahdohnak ah cun SAC ralkap 6 an thi hliamtuar an tam tiah CDF-Matupi nih cathanh a chuah.
Kaphnih kar kahdohnak a chuah hnu zanlei suimilam 2:00PM – 3:00PM kar ah SAC ralkap nih minung thazaang 30 hrawng an chap, cu hnu ah hliamhma tuarmi ralkap hna cu Helicopter in an zuanpi hna tiah theih a si.
Kahdohnak a fah caah kan ral a simi SAC ralkap lei nih van lei kahdohnak an tuah khawh caah tualchung mipi hna nih a himnak hmunhma ah i ṭhial cio ding le, ralring tein um cio ding tiah CDF-Matupi nih March ni 23 ah a thanh. The Chin Post
Ainak Khua Pawng Lainawnnak Kong : Update! Mizoram, Siaha khua mi Pi Suite, B. Lalṭhafamkima le Bablu-(kala miphun) hna cu CDF-Mindat chungtel ah ruah mi pakhat nih March 19, 2023 ah khan Mizoram ramri Ainak khua lei ah a kalpi hna i nizan March 22, Zaanlei ah Ainak khua pawng ah an ruak hmuh a si, tiah theih a si.
Min langhter a duh lomi le hi thawng a hngaltu pakhat nih cun, “Pi Suite hi CDF pa he aa hngalmi an si i, phaisa thlennawn kongkau ah Ainak lei ah cun an kal. B. Lalṭhafamkima hi motor ngeitu(driver) a si i, Pi Suite nih a motor a hman mi a si. Pablu hi kala miphun a si i, a konglam fiang in ka thei lo. Anmah a kalpitu hna CDF pa hi CDF-Mindat lei chungtel a si tiah kan theih caah pehtlaihnak kan tuah hna i, hlathlainak kan tuah cuahmah lio tiah a kan leh,” tiah tualchung media ah a chim.
Central Young Lai Association(CYLA), hruaitu pakhat nih, “Hi kong he pehtlai in CNA lei cu kan pehtlaih hna i, thawngfiang an thei ve rih lo, hlathlainak kan tuah cuahmah lio tiah a chim. CYLA lei zong kan member B. Lalṭhafamkima ruak dong ding in kan kal lai,” tiah The Chin Post ah a chim.
Nunnak a liammi hna cu an ruak a rawhral pah caah Siaha khuami an si tengteng ko tiah palik le forensic lei fehternak cu a um lo nain, Siaha khuami pathum hna cawlcangh ning le ruak umtu ning zoh ah anmah an si ko tiah ruahdamh in tualchung mi le zatlang hruaitu hna nih an ruak cu an fimhlawm hna. TCP
