Thawngtha Nai Kahdohnak Ah Ralhrang Thi Le Hliamtuar 30 Hrawng an si
Magway ramṭhen, Ngaphe le Saetottara peng a hnu lei ah a umi Rakhine Yoma tlang hmunhma ah mipi hriamtlai phu le SAC ralkap karlak ah April 8-14 tiang kahdohnak voi 3 a chuak i SAC ralkap 20 an thi tiah People’s Revolution Alliance nih a thanh. SAC ralkap pawl cu Yoma tlang in hriamngan in kah an bawmh hna, vanlawng in kahdohnak an tuah hi a si i People’s Revolution Alliance le Asho Chin Defense Force (ACDF) nih ambush in an kah hna caah SAC ralkap 20 an thi, 30 leng nih hliamhma an tuar tiah theih a si.
Cun, People’s Revolution Alliance nih an thanh ning ahcun, SAC ralkap in riansang a tlaimi pakhat le a dang rallap pakhat cu an mah tein an i that. Cun, a dang SAC ralkap riansang tlaimi 2 zong an hriam he an tlau tiah a thanh. Cu kahdohnak ah, SAC ralkap hriam le kuan tampi an chuh khawh hna i People’s Revolution Alliance le Asho Chin Defense Force phukomh in hriamtlai 2 an i hliam tiah a thanh. the chinland Post
SAC ralkap nih nawlngeihnak an lak hnu kumkhat fai chung ah mah umnak hmunhma ah um ngam loin ralzaam dirhmun a phan mi 560,000 luan an um cang, tiah United Nations Office for the Coordination of Humanitarian Affairs (UNOCHA) nih nihin April 19 ah cathanh a chuah. Mipi umnak inn, dawr le sianginn 8,000 leng SAC ralkap nih an hrawh cang i, cu chung ah cun Sagaing ramṭhen le Magwe ramṭhen ah tam bik a cang, tiah UNOCHA nih an langhter.
Kayin ramkulh chung ah SAC ralkap le KNLA kar kahdohnak a chuah ruangah minung 70,000 leng cu ralzaam dirhmun an phan, tiah KNU in ṭuanvo ngeitu Padoe Saw Taw Ni nih RFA ah a chim. Ramchung ah mah umnak hmunhma um ngam lo in ralzaam dirhmun a phan mi hi Sagaing ramṭhen in a tambik an si i, minung 230,000 leng cu ralzaam dirhmun in an phan. Kaya ramkulh chung cu a pahnihnak an si i minung 90,000 leng an si. A pathumnak ah Kayin ramkulh in an si i minung 74,000 cu ralzaam dirhmun an phan cang.
Myanmar ramchung ummi ralzaam hna chungin minung 34,500 cu India ram lei ah an zaam i, minung 1,600 cu Thailand ram lei ah an zaam, tiah an langhter chih. Cu hlan SAC ralkap nih nawlngeihnak an lak hlan ah ralzaam dirhmun in a ummi hna le, SAC ralkap nih nawlngeihnak an lak hnu ralzaam dirhmun phan mi dihlak cu sing 9 (900,000) leng an si cang tiah UNOCHA nih a langhter. The Chin Post
