Thlanglei Africa Ram Khuapi Pakhat Ah Tilian Ruangah Minung Tam Tuk Nunnak A Liam

Tuzarh chung South Africa ram, Durban khuapi tilian ruangah nunnak a liam mi cu minung 341 an phan cang. Tilian nih chiatnak fak tuk a chuahpi caah Inn le lampi hna cu an rawk i, minung le innzuat rasam tampi an tlau caah helicopter in mibawmchantu hna nih chanhchuahnak rian an ṭuan cuahmah. Lampi an rawh ruangah mibawmchantu hna caah chanchuahnak rian ṭuan a har ngai i, ei le din, sii-ai, ti thianghliam le electric mei ngei lo in tuzarh cawn nikhat ni khan an um cang.

KwaZulu-Natal ramṭhen uktu Sihle Zikalala nih cun, “Hi rawhralnak hi ngaihchia ngaingai a si. Lampi, thilri le khuasaknak ah kan herhmi thilri a rawk mi hna lengah minung nunnak a liam mi hna tuak ah cun kan ngeihchiatnak hi chimawk ṭha lo a si. Minung 40,732 nih hi rawhralnak hi an tuar i, nunnak 341 a liam,” tiah a chim.

Durban khuapi chaklei vanlawng ṭumtual pakhat in chanhchuahnak rian hi kalpi a si i, Africa palik, ralkap, volunteer lengah siangnghakchia le private contractor hna nih chanhchuahnak rian hi an bawmh hna. Africa cozah nih, minung zeizat dah a tlau i, zeitluk faak in dah rawhralnak a chuahpi ti cu an thanh rih lo nain KwaZulu-Natal ramṭhen uktu Zikalala nih cun tilian nih hin thilri nuai thong(billion) leng man a rawhter lai, tiah a chim.

Hi kokek rawhralnak he pehtlai in South Africa president Cyril Ramaphosa nih cun hartong mi ramṭhen hna caah bawmhnak a hal i, inn le lo nih a rawhtak mi mipi 2100 caah i dor chungnak hmun 17 an sak cang, tiah cozah nawlngeitu nih an thanh. Hmun cheukhat ah cun bawmhchuahnak rian ṭuan khawh a si lo caah hartong mi hna cu lungsau tein bawmchanhnak rianṭuantu hna hngak ding in Durban khuapi Cozah nih cun a nawl hna. KwaZulu-Natal Cozah zong nih mizapi sinah bawmhnak a hal i, hruk-aih ding hnipuan, ti thawl le eiding hna cu an si khawh tawk thawh cio ding in a sawm hna. The Chin Post

Tamu Khuapi Meng (4) Sakhan Pakhat An Kah, SAC Ralhrang (7) An Thi! Sagaing ramthen Tamu khuapi meng (4) nak zawnah ralhrang sakhan pakhat cu TSG le Burmese Students Organizations (BSO) ABSDF hna nih April 14 ah an kah tiah cathanh an chuah.

Cu kahdohnak ah ralhrang (7) an thi tiah an langhter. Kahdohnak caan ah ralhrang leikap nih an thazaang an i chap khawhlo nakhnga Battalion (2) nih lampi in an phihkham hna. Mipi ralkap leiah hriamnam le kuanfang thazaang herhbaunak a um caah mipi nih bawmhnak kan pe hram u tiah an langhter. Crd: Zalen