Press "Enter" to skip to content

Thluak chungah thi a chuak asiloah thi a kal kho lo (pit) mi zawtnak (Stroke) a chuahtertu a ruang

Thluak chungah thi a chuak asiloah thi a kal kho lo (pit) mi zawtnak (Stroke)
********^^*******************************************************************
Minung pum chungah a ummi cells le tissues vialte hi thi le thli (oxygen) tel loin rian tuan kho lo i a nung zong a nung kho fawn lo. Thluak thahri chung ummi titsa fate (nerve cells) nih thi le thli a hmuh/ngah lo ahcun minutes tlawmpal ah a thi kho. Thli cu hnar le kaa lei in a lut i cuap chungah a lut, cun cuap chungah thisen tlang (red blood cells) nih a lak i pum chung ummi cells vialte sinah a kuat hna. Brain attack zawtnak cu nerve cells nih a herhmi thli le thi a hmuh khawh lo ruangah siseh, cun thluak chungah thi a chuak ruangah nerve cells pawl a rawk ruangah siseh a cangmi zawtnak asi. Cucaah stroke cu phunhnih in then asi: 1) Ischemic stroke le 2) Hemorrhagic stroke.

Ischemic stroke: Hi zawtnak cu thluak nih a herhmi thi a hmuh khawh lo ruangah a chuakmi asi. Hihi thi kalnak artery kha a pit i thi a kal kho ti lo ruangah a chuakmi asi. A dammi thisen tlang cu pakhat le pakhat kha i fonh loin anmah le umnak hmun cio in a dang tein thihri (artery and vein) chungah an kal cio hna. Thi lei dam lonak a phunphun ruangah thisen tlang hna cu pakhat le khat kha an i fonh, cucu “thrombosis” tiah auh asi. Hi thrombosis cu artery chung a va luh tikah kal kho ti lo in a dir i thi kalnak lam cu a phih. Cu nih Ischemic stroke cu a chuahpi mi asi. Thisen tlang an i fonhmi ruang long si loin a dangdang thi chung ummi thilri (materials) i fonh ruang zong asi kho thiam, tck. thi chungah thau a tamtuk ruang zong asi kho, asi loah thisen tlang a rawkmi a tamtuk ruang zong asi kho ve thiam, cucu “embolism“ tiah auh asi.

Hemorrhagic stroke: Hihi intracerebral hemorrhage ti zongin auh asi i a tawinak in ICH ti asi. Hi zawtnak cu thluak chung kalmi thi phawrhtu artery kha a kek i thluak chungah thi chuakmi (bleeding or hemorrhaging) khi asi. Artery lenglei a chuakmi thi nih nerve cells kha cawl kho lo le rian tuan kho loin a tuah. Cucaah a ran khawh cungin mizaw cu sizung panhpi a hau. Hi bantuk stroke phun cu mi tlawm deuh sinah a chuakmi asi i mizaw tampi sinah a chuak duh ngaimi stroke phun cu Ischemic stroke tu hi asi.

Stroke a chuahtertu a ruang (Causes):
————————————–
• Thikai zawtnak (hypertension or high blood pressure)
• Thi chungah thau phunkhat asi mi cholesterol le lipid tamtuk ruang
• Thluak le hngawng ah artery kua/awngka a si tawnning (normal) nakin a bit deuh ruang (Stenosis zawtnak).
• Artery le vein zawtnak phunkhat asi mi vasculitis
A dangdang stroke he pehtlainak angeimi hna cu:
• Zunthlum zawtnak,
• Kuak zuk
• Thautuk
• Lung zawtnak
• Kaal zawtnak
• Thi zawtnak phunphun
• Cun kum upa lei sangah a chuak duh deuh
• Aneurysm (Aneurysm zawtnak cu thluak chung ummi artery vampang kha a derthawm i cu vampang cu aa samh i artery kha a ngan/kau deuh. A hnu ahcun a hung kek.)
• Artery le vein karlak i thi kalnak lam fate asi mi capillary kha tlamtling tein aa sersiam lomi zawtnak ruang. Hi zawtnak cu arteriovenous malformation (AVM) tiah auh asi.
• Cun cancer cells (tumor) zong nih hi zawtnak cu a chuahter khawh.
Hi a cung i langhter mi chungah thikai zawtnak hi stroke a chuahter tu bik asi.
Tha tein fianternak an tuah khawh rih lomi, a si kho mi a ruang hna lakah:
• Pum cawlcanghnak a tlawm tuk (physical inactivity)
• Zu le sii tha lo phunphun tamtuk din le hmang
• Cun kaa in ei mi sii cheukhat pawl ruang zong asi kho
Zawtnak a langhning (Signs & symptoms):
———————————————-
Hemorrhagic stroke a langhning hi mizaw pakhat le pakhat aa dang kho, nain a tanglei vun langhter mi pawl hi mizaw tam deuh sinah hmuh khawhmi asi:
• Lung a fim lo (loss of consciousness)
• Luak a chuak
• Luakluak
• Ruah lopi in lu a fak ngaingai
• Khat lei hmai, kut asi loah ke tha a dih/aui/zen.
• Lung a mit (dizzy)
• Hnuk dawh in tluk (seizures)
• Ding tein aa um thiam lo (loss of balance)
• Fiang tein le tlamtling tein bia aa chim kho lo, tha tein ti le rawl aa dawlh kho lo.
• Khuatuak hawiherhnak lei a chambau
• Zunzun le ekek a har.
• Carel le catial a har deuh
• Khua hmuhning aa dang
Hi vialte hi mizaw pakhat sinah a lang dih lai tinak asi lo. Thluak chung i thi a chuahnak hmun, cun a tlawm le tam zong nih lai a rel caah mizaw pakhat le pakhat sin a langhning aa dang cio.
Zawtnak checkhlainak (Diagnosis):
—————————————
MRI le CT-scanning hmangin zawtnak cu hmuh khawh asi.
Thlawpbulnak (Treatment):
———————————-
Sii hmangin thluak chungah thi a chuak mi cu pitter khawh asi, nain a zual deuh asi ahcun hlai (surgery or operation) tuah a hau. Stroke a chuahtertu zawtnak dangdang zong sii phunphun hmangin thlawp a hau fawn. Hitin tlawp dih hnuah mizaw cu amah sining zoh chih in tha tein aa cawlcang than khawhnak ding le damnak tlamtling a hmuh than khawhnak dingah a phunphun in zoh khenh a hau rih (recovery and rehabilitation).

Crd:netsiibawi

Be First to Comment

Leave a Reply

Your email address will not be published. Required fields are marked *