Tualchung Mipi Nih CDF-Kanpetlet Sin Ah Sia 60 Leng An Pekchanh
Tualchung Mipi Nih CDF-Kanpetlet Sin Ah Sia 60 Leng An Pekchanh. Chin ramkulh, Kanpetlet peng tualchung mi hna nih CDF-Kanpetlet phaisa lei harnak an tonmi kong he pehtlai in rulhnak ding caah tiin Sia 60 leng an an pekchanh hnanak kong CDF-Kanpetlet nih cathanh an chuah.
Kanpetlet peng zatlang uktu phu hna nih Kanpetlet peng um khuate lei ah i chok in harnak an tonmi kong ah chimfiannak le zuamcawhnak an tuahmi cu mipi nih cohlan in phaisa le zohthla ngai in an i zuatmi Sia hna cu an pekchanh, caan rau lo ah Sia 60 leng an kan pekchanh tiah an cathanh ah an langhter.
Hmundang le a hlatnak um mipi hna nih dohthlennak ah hlawhtlinnak kan hmuh tiang ṭanpi ding in le Kanpalet peng zatlang uktu phu, runvennak a tuahtu phu le mipi hna cu hmunkhat ah ṭangṭi in dirkamh ding ah le pekchanh a duhmi mipi nih Kanpetlet peng zatlang uktu phu sin ah le
Chin Defence Force -Kanpetlet page ah pehtlaihnak tuahkhawh kan si tiin February 17 ah Chin Defence Force -Kanpetlet nih thawngthanhnak an tuah. The Chin Post
Relcha; Myanmar rampi SAC nih uknak a laak kum hnih leng chung ah SAC ralkap kut in sualngak ngei lo tualchung mipi 3,000 an nunnak a liam i 19,739 tlaihkhih an tong tiah ramkhel lei thongtla bawmtu phu AAPP nih a langhter.
Atu ah langhtermi cazin hi 2021 February 17 in 2023 February 17 tiang khomhsuatmi cazin a si i, atu ah langhtermi nakin a tak ah nunnak liammi an tam deuh kho tiah AAPP nih cun a langhter.
Khuapau dohthlennak thawk in nihin tiang ah tlaihkhih a tongmi 15,882 an si i cu chung ah 4,398 hi thongthlak ding in biakhiahnak tuahpiak an si. DVB
Sagaing ramṭhen Monywa khuachung kah-ngiah-nah(ကညန) zung ah umhmun a khuarmi SAC ralkap hna cu a thli in kahdoh an ton caah SAC ralkap 3 an thi tiah Chindwin Attack Force in ṭuanvo ngeitu pakhat nih a chim.
February ni 16, zan suimilam 9:50PM ah Monywa khuachung kah-ngiah-nah(ကညန) zung ah umhmun a khuarmi SAC ralkap hna cu tualchung hriamtlai phu nih a thli in an kahdoh hna caah SAC ralkap 3 cu hmakhatte ah an thi, cu hnu ah kaphnih kar minutes 5 hrawng kahdohnak a chuah hnu ah SAC ralkap lei bawmtu tampi an thlah hna tiah theih a si.
Monywa khuachung SAC ralkap a dohtu hna cu Monywa pengkomh tualchung hriamtlai phu (Chindwin Attack Force) battalion 2, battalion 3, battalion 4, Special Commando Force(Monywa The Boys), Speciwl Investigation Operations Force(Chindwin Attack Force) le Spring Dove phufonh nih an kahdoh hna. Tualchung hriamtlai phu lei hliamhma tuarnak um loin hnu an tolh kho tiah theih a si.
