Press "Enter" to skip to content

Tuni Ah CDF Nih Ralhrag An kah Hna I Tam Taktak an thi

CDF-Matupi nih SAC Ralkap 8 An Thah Hna Pinah 7 Hliamhma An Pu, Nihin April 27 zingka ah Matupi in Mindat lei a kal mi SAC ralkap mawṭaw pawl cu Matupi in meng 91 a hlatnak ah, CDF-Matupi nih zanlei sml 4:38 ah an kah hna, tiah theih a si. Cu kahdohnak ah SAC ralkap lei in 8 an thi i, 7 hliam an tuar. Tuzan cu Chianpian khua hlun ah an riak, tiah CDF-Matupi Battalion-1 sin in theih a si.

Chin ramkulh, Falam Market sak ṭhan ding in Tualchung mi nih Market sak nakding Committee cu April 26 ah an dirh, tiah theih a si. Cu Committee cu Dr. Run Bik Taithio nih a hruai hna i India um Myanmar Embassy ah Market sak nakding bawmh hal an i tim, tiah kan theih. Ni kum November thla ah Dr.Run Bik Taithio nih Myanmar-India Ambassador pa a rak ton bal. Falam market cu kyats sing 10000(thonghra) dih in, dotthum in sak an i tim, tiah kan theih.

Dr. Run Bik Taithio aa zuamnak thawng in India ram um Falam Town Hall saknak le Cultural inn saknak zong an rak bawmh hna. Dr. Run Bik Taithio cu India ram New Delhi ah Aung San Suu Kyi nih a rak dirh mi, Prospect Burma sianginn ah kum saupi principle rian a ṭuan caah India cozah he aa thei hngal ngai mi an si. The Chin Post

Pyusawtee le SAC ralkap nih a hman mi hriamtlai pawl cu NUG nih, SAC ralkap kuttang sinak chuahtak ding in ralrin a pek hna. Cun PDF he i fonh ding zong nihin April 27 ah a forh hna. PDF sin ah rak i fonh ulaw nan himnak kong ah ṭuanvo ka lak lai, tiah NUG nih a kamh hna. SAC ralkap nih Pyusawtee cu training an pek hna i PDF he kahdohnak a chuah tik zong ah hmunkhat ah an ṭangṭi tiah theih a si.

“Sagaing ramṭhen, khuate cheukhat ah cun training kan pe ko u, tiah an kan ti caah training kan pek hna i bu zong kan serpiak hna,” tiah SAC ralkap chimphuannak nawlngeitu Zaw Min Thun nih a chim. SAC ralkap nih mizapi inn le lo mei in an khangh, an ngeih mi thilri an firpiak chap hna pinah an thah hna. Hi sualnak an tuah mi vialte hi record kan tuah dih, tiah NUG Ministry Of Defense nih a langhter.

SAC nih uknak an lak kumkhat leng hnu ah SAC ralkap le anmah lei ṭang hriamtlai hna nih mizapi inn an khangh mi hi inn 9187 a si cang i, cu chung ah Sagaing ramṭhen in inn 5617 a kaang, tiah Data for Myanmar nih April 14 ah cathanh a rak chuah. the Chin Post

Be First to Comment

Leave a Reply

Your email address will not be published.