Press "Enter" to skip to content

Tuni Kahdohnak Ah CDF- Kanpetlet Nih Ralhrang 7 An Thah Hna

Nihim March 4 chun SAC ralhrang le CDF- Kanpetlet kahdohnak ah ralhrang 7 an thi, tiah theih a si. Nihin March 4 chunhnu sml 1:40 ah Chin ram Kanpetlet penge Magwe ramṭhen ramri simi Kyauhthuh peng lei ah hmun 3 in rallam a rak sial mi SAC ralhrang pawl le CDF- Kanpalet karlak kahdohnak a chuak i, SAC ralhrang 7 an thi, CDF-Kanpalet lei cu kan him, tiah CDF- Kanpetlet nih cathanh an chuah.

Cun, Kahdohnak kong ah CDF- Kanpetlet nih official tein a thanhmi lawng hi mipi nih zumh ding le a dik mi a si lai, tiah CDF-Kanpetlet nih an thanh chih.

THAWNGPANG DANG….Hpa-an Kanbawza (KBZ) Bank Cu Aho Hngalh Lo Mifir 5 Nih Luhhnawh: Kayin ramkulh, Hpa-an peng No. 2 sang ah ummi Kanbawza (KBZ) Bank branch-1 ah, nihin March 4, zanlei sml 3 hrawng ah aho hngalh lo minung 5 cu bank chung ah an lut i meithal voihnih an puah hnu ah phaisa sing 1000 leng an laak, rianṭuantu hna phone zong an chuh hna, tiah Hpa-an thawngzamhnak nih Yangon Khat Thit ah a chim.

Mifir hna nih cun Bank chung i CCTV pawl zong an hrawh. Atu ah Hpa-an khua luh le khua chuahnak ah heh tiah michawlet an chek ti thawng theih a si. February 28 ah khan Shan ramkulh, Tipaw(သီပေါမြို့) ah ummi KBZ bank zong luhhnawh a tong i phaisa sing 1000 leng an laak piak hna. A firtu cu an tlai kho lo, tiah theih a si.

Ni 2 Chung Ah Gangaw Peng Minung 10 nak Tlawm Lo Thah An Tong: Magway ramṭhen, Gangaw peng ah ralhrang le pyosawthi phu nih ni 2 chung ah minung 10 an thah hna i inn 211 an khanghpiak hna, tiah Gangaw peng zatlang uknak phu nih nihin ah an thanh.
SAC ralhrang le pyosawthi phu hna nih February 28 le March 1 ah Shwebo le Kaantoo(ကံတိုး) khua inn 26, Tintaw(သင်တော) khua inn 147, Mintaa(မြင်သာ) inn 2, Kung (ကုန်းရွာ) khua inn 36 cu mei in an khangh, tiah theih a si. Minung an thah mi hna le inn an khangh mi hi atu tiang kan theih khawh tawk a si i, hi nakin a tak ah a tam kho, tiah Gangaw peng zatlang uknak phu nih an thanh.

Be First to Comment

Leave a Reply

Your email address will not be published.