Tuni Kahdohnak Ah PDF Pasal Tha Minung 7 Hna Nih Ram Le Miphun Caah An Nunnak An Pek Than

Kachin ramkulh, Muhngin (မိုးညှင်း) le Nanthma(နန့်မာ) khua kar nihin March 7, zinglei kahdohnak ah PDF in minung 7 an nunnak a liam i, SAC ralkap lei in minung 20 nak tlawm lo an thi, tiah theih a si. “Nunnak a liam mi PDF hna cu Nanthma (နန့်မာ) khua mi minung 3, Muhngin (မိုးညှင်း) in minung 2, Yangon in minung 2 an si. SAC ralkap motor pakhat cu a kaang i SAC ralkap chungtel minung 20 nak tlawm lo an thi, hliamhma tuar zong an tam tiah,” khuachung thawngzamhnak Manaw Athan(မနောအသံ) nih a langhter.

Muhngin (မိုးညှင်း) in a chuak mi SAC ralkap hna motor cu KIA le mizapi vengtu ralkap phufonh nih bomb puahhnawh in an doh hna. Nihin March 7, zinglei suimilam 7:00 hrawng ah kahdohnak a chuak, tiah theih a si. Kahdohnak chung ah hriamngan le hriamhme kah thawng cu Muhngin(မိုးညှင်း) le Nanthma (နန့်မာ) khua in theih khawh a si. Hriamngan kah thawng ṭih in dawr ngeitu hna nih an dawr cu an khar i, an zaam, tiah theih a si. SAC ralkap hna motor kahdoh an ton hnu ah Muhngin (မိုးညှင်း) lei in SAC ralkap motor dang 6 cu kahdohnak a chuahnak hmun ah an phan ṭhan, tiah theih a si.


THANWG DANG..Chin ramkulh chung khualtlawng mi hna le motor khaltu hna nih Mindat-Matupi motor lampi cu hmang ding in Matupi ummi SAC byu-ha-hmu nih a chim, tiah motor khaltu hna sin in theih a si. Mindat-Matupi motor lampi ah SAC ralkap hna le mizapi vengtu ralkap kahdohnak a chuah hnu ah, khualtlawng mi hna le motor khaltu hna nih a lethnih hrawng aa hlatnak lam Pakokko-Gangaw-Matupi motor lampi cu an hman cem.

“Byu-ha-hmu nih khualtlawng mi hna le motor khaltu hna cu a kan auh i, bia a kan chimh, ‘Mindat-Matupi motor lampi hi hmang cang ko uh, lampi checknak kong ah ṭuanvo kan lak lai,’ tiah a chim. Cun, ‘thilphor motor ngan hna zong a si ah Matupi khuachung i a luh lo caah thilman a kai mi hi SAC ralkap ruangah siloin CDF nih lam an phih, bomb an hmanh i motor a luh khawh lo caah a si’ ti in a chim,” tiah motor khaltu pakhat nih a chim.

A luancia February 28 zong ah Matupi in Pakokko lei ah a kalmi khualtlawng motor 20 le thilphor motor 10 cu Mindat-Matupi lam tanṭim an phak in Matupi lei ah an kir ṭhan, tiah theih a si. “Cuhlan ah Matupi in Pakokko kal ding khualtlawng minung pakhat cu motor cit man 20,000 ks fai deuh pek a rak si, nain atu ah cun motor cit man 50,000ks an kan hal cang, cu hmanh cu Matupi in Gangaw-Pakokko lam in kal ahcun 150,000ks an kan hal,” tiah Matupi khua mi pakhat nih a chim.

Matupi ummi SAC byu-ha-hmu nih khua nu khua pa le biaknak lei upa hna cu tonbiaruahnak a ngeihpi hna i lampi phihkhamnak kong ah kanmah cu an kan hnorsuannak a um lo, khua mi tu hi hnorsuan nan si deuh. Kanmah cu riahcaw phorhnak kong a si zong ah SAC motor in thiar khawh a si, a herh ah cun helicopter zong in thiar khawh a si, tiah a chim.

“SAC ralkap hna nih Mindat-Matupi motor lampi cu anmah nih an uk khawh ti khi langter an duh tiah ka ruah, cuka motor lampi lawng cun an kan kalter. Cun, cuka lam in kan kal a si ahcun CDF lei zong nih anmah sin ah thawngthanh hma hnu lawng ah kalter an kan duh ve. Mi cheukhat cu khualtlawng sawhsawh bantuk i umter in SAC ralkap an si lai ti zong phan a um,” tiah khualtlawng motor khaltu pakhat nih cun a chim

Leave a Reply

Your email address will not be published. Required fields are marked *