Uico SAC Ralkap Nih Hakha Peng Tinam Khua Inn 10 Hrawng An Khangh Cang

Council ralhrang nih Tinam khua inn 10 hrawng an khangh cang, March 28, 2022. Hakha, Zokhua Peng chung kahdohnak zarhkhat chung a chuah hnu Council ralhrang nih Tinam khua inn pawl cu 2022 March 28 ah an khanghpiak hna tiah theih a si. Atu an khangh mi inn hi a langtlang in kan cuanhnak ah cun inn 10 fai a si cang. Zing suimilaam 10:30 tluk inkhan meikhu kan hmuh cang tiah khuami nih an chim.

Zokhua Peng chung ah CDF Hakha, CNA hna i bawm in Council ralhrang an kah hna hi zarhkhat fai a si cang. Ni li an i kah hnu ah Council ralhrang nih CNA, CDF hna cu karceh in kah an timh hna tiah kan theih. Inn a kangmi kong he pehtlai in, “Inn an khangh hi nihin zinglei sang ahkhan a si.

A tlawm bik inn 10 cu a kaang cang men lai. Dikthlir in cun kan thei kho ve rih lo. Kan zaamnak hmun in a khu kan hmuh mi a si. A kangh ning zoh ah a tam lai,” tiah khuami pakhat nih a chim. Inn an khangh pah in meithal le bomb an puah chih tiah theih a si. The Hakha Post

Karen ram Wallay kahdohnak ah SAC ralkap 20 leng an thi kho. Karen ram, Wallay kahdohnak ah SAC ralkap 20 leng an thi kho i a zaa leng an i hliam khawh lengah ralkap ruak lam cungah an um ko tiah Cobravnih thawng a thanh. March 27 ah Karen ram, Myawaddy peng, Laykaykaw tan in Phlu khua in Wallay ah a rak lutmi SAC ralkap battalion (44) le battalion (22) cu Cobra nih an rak kah hna.

Kaphnih kar kahdohnak cu zinglei sml 9:00am in zaanlei sml 4:00pm tiang Myawaddy-Wallay lam cungah a cang. SAC ralkap lei in a thimi an tam caah Mi 2 helicopter, Mi 35 helicopter pahnih in kah an rak bawmh hna. Mipi hriamtlai phu hna hohmanh I hliam lo tein an kir kho.

SAC ralkap 20 leng an thi kho I a zaa leng nih hliamhma an tuar. SAC ralkap an ruak pawl cu lam cungah an I samh ko tiah Cobra nih a thanh. KNLA zong nih March 27 kahdohnak ah SAC ralkap tampi an i hliam i a tlawmbik 20 cung an thi kho tiah a langhter ve. The Chinland Post

Terrorist phu pawl hrawh an si lai tiah Min Aung Hliang nih a chim. 2022 March 27 – Hramhram uknak latu Kawl Ralkap phu (SAC) nih ralhrang an sti tiah thanhmi Ralhrang (Terrorist) phu pawl, Terrorist Organization pawl tha a petu phu pawl he ramkhel lei biaruahnak ngeih loin kan hrawh dih hna lai tiah an lutlai Min Aung Hlaing nih a chim.

Mah bantuk phu hna telh loin NCA minthutnak a ngeimi phu pawl he cun biaruahnak kan ngei lai i [NCA] min a thu rih lo phu zong riikhiah lo (precondition) tein zalong tein biaruahnak kan ngei lai tiah a chim.
Asinain, Karen National Union (KNU) in ramdang lei kong rianngeitu Pado Saw Taw Nee nih “kahdohnak dinhdorh loin SAC a tlak tiang kan doh lai,” tiah RFA ah a chim.

“Kuan tampi a um ko buin zeihmanhtuah khawh loin a sung an pek caan a tamtuk cang. Hmun tampi ah a cang cang. Kahdohnak lawng hi ralkap hrawhnak a si lo. Thil tampi aa rak fonh tikah an mah lei nih zeitin hmanh in an ṭhawng kho ti lai lo tiah zumhnak fek ka ngei. Cucaah, kan tuah rih dingmi cu hramhram uknak hrawh khawhnak ding caah kan tuah hrim lai”.

SAC Ralkap ralhrang nih amah a dohkaltu chung in, National Unity Government (NUG) le a kuttang ummi People Defense Force (PDF) pawl cu ralhrang (Terrorist) phu pawl tiah a thanh, a chiahmi hna an si.
2023 ah zalonnak kan ngah kum 75 a tlin lai caah atu caan karlak ah ramchung buainak daihter ding kan tawlrel lai tiah Min Aung Hliang nih a chim.

Ralkap nih anmah lei lawng (kapkhat) kahdaihnak kan tuah tiah a chim fawn. Atu bantuk ramchung buainak hi tlangcung hriamtlai phu EAOs sin in a raami a si tiah SAC hruaitu nih a chim.
March 27 ah tuahmi Ralkap Ni (Armed Forces Day) ah Karen ramkulh, Muṭaw peng, Pekay khua lei ah SAC nih vanlawng in a kah caah mipi inn cheukhat a rawk tiah KNU nih a thanh.

Cun, Kachin ram, Moekaung peng, Kasung khua pawngah Kachin Independence Army (KIA) battalion-2 cu March 27 ah SAC nih vanlawng in a kah tiah KIA nih a chim. Natmatee peng chungah kahdohnak um lo buin SAC nih bom in an kan kah tiah KIO Major Nawbu nih RFA ah a chim.