Press "Enter" to skip to content

Uico SAC Ralkap Thazaang 30 Hrawng Nih Mipi Vengtu Ralkap Sakhan An Luh Hnawh Hna, A Nung In Pa 2 An Tleih Hna Ee!

Magwe ramṭhen, Natmout (နတ်မောက်) pengchung PDF sakhan pakhat cu SAC ralkap hna nih March 17 zinglei suimilam 9:00 hrawng ah luhhnawh in an kah hna, tiah theih a si. Cu sakhan cu SAC ralkap minung thazaang 30 hrawng nih luhhnawh in an kah hna i, cu sakhan in PDF 2 cu tlaih an tong, tiah Natmout(နတ်မောက်) mizapi vengtu ralkap in ṭuanvongeitu Bu Ya Kyaw nih a chim.

“SAC ralkap nih cu sakhan cu an luhhnawh lai kan theih caah hmunhma dang pakhat ah i ṭhial ding in timhcia a si, nain PDF ralkap 2 cu ruahlopi in tlaih an tong. Tlaih a tong mi PDF chung in pakhat cu GTI kum hnihnak a kai mi siangngakchia Mawng Saung Oo Lin a si i, pakhat cu Han Lwin Oo an si,” tiah Bu Ya Kyaw nih cun a chim.

SAC ralkap nih sakhan an kan luhhnawh lio ah SAC ralkap hna nih cun hriamngan in voi 3 hrawng an kan kah. Cu hnu ah vanlawng in ralkap bawmtu an phan ṭhan, tiah Bu Ya Kyaw nih cun a chim chap. “Kanmah lei cu phuhnih ah kan i then i, SAC ralkap nih hriamngan in voi 3 hrawng an kan kah tlawmpal ah vanlawng 2 an ra i, phuhnih ah i then in kan zaam caah an i timhning in an kal kho. Vanlawng pahnih an ra nain an kan kap kho lo i, an kir ṭhan,” tiah kahdohnak kong cu a chim.

Cun, SAC ralkap nih PDF 2 an tlaih mi hna cu ‘kan thlah cang hna’ tiah thawng dik lo an thanh. PDF an tlaihcia mi thlah cu chim lo, midang tlaih ding hmanh an kawl, tiah a chim chap. Magwe ramṭhen ah hin SAC ralkap hna le mizapi vengtu ralkap hna cu atu le tu an i kap, tiah theih a si. Credit; The Chin Post

Russia nih Ukraine ramchung Crimea a chuh kum 8 tlinnak puai cu March 18,2022 ah Russia khualipi Moscow khuapi Lentecelhnak hmun ah tuah a si i, President Putin nih bia a chim lio ah Russia ram media nih live an thlahnak cu ruah lo piin internet line a tlau, tiah theih a si. Putin nih a biachim cu ngol loin a dongh tiang a chim ko nain TV ah cun Putin biachimnak lang loin ramhla saknak le laamnak lawng a lang i, IT lei chanbaunak a um caah atu bantuk in ruahlo piin line a tlau hi a si, tiah Russia cozah nih a thanh.

Ukraine a tuknak ni 23 nak ah Crimea kum 8 tlinnak puai hi tuah a si i, Putin nih cun, “Ukraine kan tuk hi a herh caah a si, A ruang cu US nih Ukraine hmang in Russia cu a rak ṭhihphaih cang. Cun, Ukraine ramchung ah Russia holh hmang mi an umnak hmun poh ah miphun cihmih thahnawnnak a um i, cucu kan kilven a hau,” tiah a chim.

Ukraine Cozah tu nih cun Putin nih a kan puh mi miphun cihmih thahnawnnak hi a um bal lo, mi thluak ṭawlnak ah a chim, an ti i US zong nih Ukraine hmang in a ṭhihphaih timi cu sullam ngei lo a si, tiah an ti ve. Putin bia a chimnak stage hnulei ah cun, “Nazi lungput umlonak Vawlei” tiah sullam a ngei mi ‘Z’ symbol ralkap mawṭaw ah ai ṭial mi an i tlar.

British Media Regulator Ofcom Nih Russia Media RT Cu License A Phih Piak: British Media Nawlngeitu Sang Ofcom nih cun, Cozah nih nawlnak a tuah bantuk in Russia Media RT TV cu British ramchung ah thawngzamhnak nawl (license) phihpiak an si cang, tiah March 18 ah an thanh.

“British ramchung i thawngzamhnak nawl (license) cu nihin March 18 ah kan chuh ṭhan cang hna, RT license ngeitu ANO TV Novosti cu British ramchung ah thawngzamhnak license ngei ding in aa tlak lo kan ti caah kan chuhnak hi a si,” tiah an thawngthanh ah an langhter. RT hi phunglam an buarnak case 29 an chekhlat cuahmah lio le bia ceih an si lio ah atu bantuk in license chuhpiak an si. Credit: The Chin Post

Be First to Comment

Leave a Reply

Your email address will not be published.