Ukraine Khuapi Ngan Deuh Deuh Cu Russia Nih Vanlawng In Kah Hna
Russia nih Ukraine khuapi ngan deuhnak paoh cu March 12 zinglei caan ah vanlawng in an kah i, Ukraine khualipi Kyiv zong Russia ralkap nih an naih thluahmah cang tiah theih a si.Kyiv, Kharkhiv telh in khuapi (5) ahcun vanlawng kahnak a zual ruangah ralrin peknak thawng lawng tein a khat tiah anmah ramchung thawngzamhnak ningin theih a si.
Khualipi Kyiv zong March 11 zaan thawkin a puak thawng a thang cang i, March 12 zinglei caan tiang a si tiah CNN nih a langhter.Ukraine cu Russia nih a luhhnawhnak ni (17) nak tiangah Russia ralkap hna cu Kyiv khuapi in km (15) hlatnak tiang an phan cang tikah minung umnak inn tiangin an kah tiin thawngzamhnak cheukhat nih an langhter.
Biatak tein kahdohnak tuahtu phu cu Kyiv khuapi in cheklei sang lampi cungah an um nain khuapi in nitlaklei vanlawng tuah leikap ahcun kuanfang a kham khomi motor pawl an i chawk tiin American Satellite Company Maxar nih hmanthlak he a langhter.
Atu kahdohnak caan cu phundang deuh in kalpi a si tikah thil sining aa hel ning hi that lei a panh i, teinak lampi kan phan dengmang tiah Ukraine President nih a chim ve.
Kahdohnak ruangah Ukraine ram a chuahtaktu minung zat hi 2.5 millions leng an phan cang tiah UNO nih cathanh a chuah.
RELCHAP..A luancia 2022 March 5, zaan suimilam 9:00 ah Chin ramkulh, Falam khuachung inn 4 cu minung pathum nih dat-sii toih in khangh an rak timh nain an hlawhtling lo. Misual 3 hna cu an i timhmi a tlamtlin lo caah March 6, 2022 zinglei suimilam 10:00 hrawng ah Falam-Rih lampi lei ah kal in, cuka lampi Laimual(လိုင်းမွာလ်) khua phak hlan inn pakhat cu an khangh.
Falam khuachung inn khangh an timh lio cu CCTV ah record a si i, mit hmutu hna zong nih CNO/CNDF sinah an theihter hna. CNO/CNDF nih hlathlainak an tuah hna i Biak Ceu Lal, Ceu Lian Hum le Sang Lian an si, tiah theih a si. Biak Ceu Lal le Ceu Lian Hum cu Mizoram state, Aizawl ah tlaih an si i, Sang Lian cu Mizoram chung ṭhiam Zokhuathar ah tlaih a si. CNDF nih thonginn ah an hren hna, tiah theih a si.
2022, March 6 zaanṭim suimilam 11:30 hrawng i Falam khuachung Tlanglo sang inn 3 kanghnak kong zong ah lunghrinh an si i, kherhhlainak tuah cuahmah lio a si. Falam khuachung mizapi umnak inn hrawhpiak duhnak le thinphan thlalaunak a chuahter khotu thil a tuahtu misual pathum hna cu mizapi vengtu CNO/CNDF nih faakpi in dan an tat hna lai, tiah Chin National Organization nih cathanh an chuah.
