UN Chief Dy. Spokesperson Farhan Haq Nih Ralhrang Kut In Ngakchia lungfim lo 114 An Thi Cang tiah Thawng Athanh
Myanmar ram ah ralhrang nih uknak an laak hnu in kumtling lo ngakchia tlaih, hrem le thah tiang a tong mi an tam caah lungrethei ngai a si, ti in UNICEF nih thawng an thanh, tiah UN chimphuannak nawlngeitu pakhat(UN Chief Deputy Spokesperson) Farhan Haq nih nizan nikhatni(Monday) ah khan a chim. Ralhrang nih uknak an laak February 1 thawk in nihin ni tiang ah ralhrang nih ngakchia 114 an thah cang hna!
A luancia January thla thlakhat chung lawng hmanh ah ngakchia 18 thah an tong, tiah Farhan Haq nih New York i UN thawng thanhnak (press conference) ah a chim. UN nih ngakchia zohkhenhnak kong le an covo kong ah lungtling tein biakhiahnak a ngeih mi cu zul ve ding in Myanmar zong nih min rak thut ve. 2019 ah Myanmar ngakchia hna humhimnak ding ah phungphai/zulhphung an rak tuah cang mi zong zulh a herh, tiah UNICEF nih an langhter.crd the chin post
thawngdang…Kalay Peng, Kyantha khua in a rak zaam mi ralzam 39 cu Hakha Township Public Healthcare & IDPs Management Committee aiawhtu hna nih Tiphul khua tiang an va don hna i nihin ah Hakha khua dam tein an rak phan, tiah theih a si. “Atu kan va don mi hna hi Mindat peng kahdohnak ruangah Kalay peng, Kyantha khua ah a zaam mi an si. Kyantha khua hrawng ah kahdohnak a chuah ṭhan caah Tiphul tiang a rak zaam ṭhan mi a si. Tiphul khua a phan mi hi minung 90 hrawng an si lai.
“Atu kan don mi hna hi 39 lawng an si. A taang mi cu Mindat khua lei ah kir ṭhan a duh mi an si. Ralzaam 39 cu COVID-19 zawtnak zong kan check hna i an dihlak in an dam dih. Atu hi CCU IDP Camp ah kan chiah hna i, an ca ah bawmhnak zong kan herh ko,” tiah Hakha Township Public Healthcare & IDPs Management Committee in rianngeitu pakhat nih a chim. Tiphul khua ah a taang ta mi Mindat khua lei kir ṭhan a duh mi hna cu Mindat peng chung kahdohnak thawngpang a daih ahcun kir ṭhan colh an i tim, tiah theih a si.
