UN General Meeting Ah Kawlram Nih Russia A Dohkalh Ve Cang
United National (UN) General meeting ah Russia nih Ukraine a tuknak kong ah UN chungtel ram pawl nih Nizaan March 2 ah vote an thlak i Myanmar nih Russia dohkalh in Ukraine a dirpi. UN General Meeting ahcun Myanmar aiawh in Ambassador U Kyaw Moe Htun nih vote a thlak i Russia a sual ko, tiah vote a pek.
Russia a palh i Ukraine mipi kan dirpi hna, tiah biakhiahnak biatung UN ah a chuahpitu zong ah Myanmar ai tel ve, tiah theih a si. Myanmar ram aiawh in UN ah vote a thlatu hi Kyaw Moe Htun a si. “Russia a palh i Ukraine mipi kan dirpi hna” timi vote nih a tei, ram 141 nih Ukraine dirkamhnak le Russia sualphawnak vote an thlak i,
ram 5 nih Russia dirkamh in vote an thlak ve i, ram 35 nih vote an thla lo. Russia lei ṭang in vote a thla mi ram hna cu Belarus, N. Korea, Syria le Eritrea ram hna an si i, Vote a thla lo mi ram 35 hna lak ah Myanmar ram inpa India, China le Bangladesh, ASEAN chung in Vietnam le Laos hna an i tel. Credit: The Chin Post
UN kong Myanmar Palai U Kyaw Moe Htun nih Asia- Pacific group i rianchawn Chairman cu thlakhat chung tlamtling tein a ṭuan khawh cang, tiah March 1 ah an thanh. Member ram 54 an i telnak Asia- Pacific group i rianchawn Chairman cu February 1-28 tiang tlamtling tein a ṭuan khawh cang. Hi Asia- Pacific chiarman rian cu Member simi ram hna nih Alphabetical order tein thlakhat voikhat in Chairman ṭuan an i chawn cio mi a si.
“February thlachung caah Asia- Pacific Group Chairman rian cu tlamtling tein kan ṭuan cang. Cun, a kan telpitu Asia- Pacific Group chungtel ram dihlak cung ah kan i lawm,” tiah NewYork khuapi um UN Myanmar Palai zung nih a thanh. U Kyaw Moe Htun nih Asia- Pacific Group chairman a ṭuan chung ah- Thiamsang hna he meeting voikhat, February 28 ah Asia-Pacific chungtel dihlak thlakhat voikhat meeting ah Chairman ṭhutdan in caan a tlaih.
Covid-19 Raikhamsii Chunh Ding Ah AA Nih Forhfial: Arakan(Rakhine) ramkulh chung ah nawlnolh in Covid a karh ṭhan caah Covid zulhphung ṭha tein zulh ding le Covid raikhamsii chunh hrimhrim ding ah Arakan Army(AA) nih nizaan March 1 ah cathanh chuah. Covid zawtnak i chawnh ruangah Sittwe siizung tel in Arakan ramkulh chung siizung 3 le pengkulh siizung hna ah ai thlop cuahmah mi mizaw 300 leng an um, tiah Arakan SAC nih an thanh.
SAC hruainak in kan hnu Febuary thla chung ahkhan Arakan( Rakhine) ah minung ting 14 leng( 69%) cu Covid raikhamsii an i chun cang, tiah State ngandamnak zung cazin ah an langhter. AA nih an kan nawl ruang ah AA ralkap pawl le an chungkhar hna le tualchung mi hna zong Covid raikhamsii kan chunh hna, tiah State ngandamnak zung in Dr. Soe Win Paing nih RFA ah a chim.
Arakhan ramkulh chung ah Covid in a thi mi cu an um lo nain Sittwe siizung ah mizaw 129, Kyauhphyu siizung ah 26, Thantwe siizung ah 22 tel in a dang siizung ai thlopmi 207 an si, tiah Rakhine Ramkulh SAC nih Febuary 26 ah langhter. Nizaan March 1 tiang ah ram pumpi Covid hrik hmuhmi cu 590,237 an si i, covid zawtnak in minung 19,372 an nunnak liam cang, tiah SAC ngandamnak zung nih a thanh. Credit: The Chin Post
