UN Nih Kawlram Harnak Tong Mipi Caah USD 826 millions Bawmhnak A Hal

Ralhrang nih uknak an laak kumkhat chung ah a chuak mi thahnawnnak le raltuknak ruangah hartong mi Myanmar mizapi hna ca ah minung hawi zawnruahnak he bawmchanh ding ah USD 826 millions UN nih bawmhnak a hal. Ralkap nih uknak an laak kumkhat chung ah Myanmar mizapi singli leng nih inn an chuahtak i mizapi(civil) 1500 reng lo an thi cang, tiah an cathanh chung ah cun an ṭial chih.

Ralkap uknak duhlonak langhternak ah Myanmar ram khuapi kip ah February 1 ralkap uknak laak kumkhat camtuak ah “Silent Strike” an tuah i Myanmar khuapi ngan bik Yangon khuachung zong daidup in a um i, Silent Strike a dih in an kut zapei an bengh hna, tiah theih a si.

Myanmar buainak cu a linhsat tuk cang caah UN Human Rights ah rianngei simi Ms. Michael nih cun Myanmar ram cu Syria ram he tahchunh zong in bia a rak chim i, dai tein lam a zawhmi mibu an thahnawn hna caah hriamtlai thar a dirmi le a um ṭhing mi he an i fon i ral an thawhnak hi a si, tiah a chim chih. Cu ramchung ralthawh ruang i hartong mi Myanmar mizapi hna ca ah UN nih USD 826millions bawmh a halnak cu a si. BBC

Netherlands Ram Um Myanmar Mizapi Nih ICJ Biaceihzung Hmai Ah Ralhrang Duhlonak An Langhter; Netherlands ram um mi Myanmar ram hrinfa hna dihlak fonh in ralhrang nih unknak laak kumkhat tlin ni ah ICJ biaceihzung hmai ah duhlonak an langhter, tiah theih a si.

ICJ biaceihzung AMSTERDAM-Dam Square hmai ah cun a biapi bik in biatlang pathum an aupi 1) Ralhrang uknak kan duh hrimhrim lo. 2) NUG hi Myanmar mizapi nih cohlan mi Cozah a si. 3) UN ah Myanmar Palai ding cu U Kyaw Moe Htun a si, tiah a biapi in an aupi.

ICJ zung hmai i duhlonak an tuah lio ah ram le miphun ca ah nunnak a petu miraltha( Martyrs) hna upat peknak ah minute pakhat chung dai tein an um. Cu duhlonak langhternak ah a rak ra mi hna nih cun siaherh biatawi an chim cio hnu ah Myanmar time zaan suimilam 8:00 ah Myanmar ram um mi mizapi he hmunkhat te ah darkheng an tum ve. Ref: The Chin Post