UN Security Council Nih Kawlram Kongah Thinphang Tuk A Si An Ti

Myanmar ram ah nawlngeihnak latu ralhrang phu hna nih caan karlak nawlngeihnak an sauhnak kong ah thinphang tuk a si, tiah UN security council nih nizan February 2 ah cathanh a chuah. Myanmar ramchung mipi nih an khuakhan mi le ramchung ah thil ningcang tein thil kalpi a si khawhnak ding ah a tak in cawlcanghnak tuah ding in security council nih forhfialnak a chim.

Myanmar ram ralhrang phu hna nih nawlngeihnak an laak kumkhat a tlin ah UN Security Council chung tam deuh nih lungtlinpinak he cathanh an chuah ning ah Myanmar rampi ruahnak petu Aung San Su Gyi, President U Win Myint le phungning lo tlaihkhih a tong mi vialte cu thlah dih ding in UN chungtel ram 15 le UN Security Council nih nawlnak a tuah ṭhan.

Myanmar ah ralhrang hna nih nawlngeihnak an laak ruangah ralhrang uk duhlo langhternak cu a chuak i, ralhrang phu hna nih ralhrang uk duhlo langhter in lamzawhnak a tuahtu mipi hna cu hramhram in an ṭhencheu hna, sualnak ngeilo mipi minung 1500 hrawng an an thah fawn hna. Cupin ah minung 11,800 hrawng cu phungning lo in tlaihkhih an tong, tiah theih a si.

Myanmar ramchung i phung ning lo tuahsernak vialte cu ngol in, mizapi himnak ding ah runvennak tuah ding in security council nih an cachuah mi ah cun nawlnak a tuah. “Myanmar ramchung ah ralhrang phu hna nih phung ning lo tuahsernak an tuah mi a karh chin nakkong ah Security Council chungtel kan thin a phang tuk, tiah an langhter.

Cun, ramchung ah mah umnak inn le lo kaltak in ralzaam dirhmun a phan mi zong an karh tuk caah thinphang in kan um, tiah an langhter chih. Ralhrang cozah nih nib ngandamnak, fimcawnnak le ramchung mizapi ṭhanchohnak an hrawh tuk ruangah kan duh lo i, sual kan phawt,” tiah an cathanh chuah mi ahcun an langhter. Source: The Chin Post