US-ASEAN Tonbiaruahnak Meeting Caan Cu An Thawn Ṭhan Hoi
US-ASEAN hruaitu pawl tonbiaruahnak ngeih ding mi caan cu kan thawn ṭhan i a nicaan kan khiah ṭhan te lai, tiah White House nih March 17 ah a thanh. Tuan ah cun US President Biden nih ASEAN hruaitu hna he tonbiaruahnak cu March 28-29 tiang ngeih ding ah a rak timhtuah nain, hruaitu tlamtling in ai tel kho ding an si lo caah March thla chung ah tonnak ngeih ding ti cu an let ṭhan.
“Sawm mi ASEAN hruaitu upa vialte an intel khawh nakhnga tonnak caan zeitik a si lai ti mi nicaan khiah ding cu ASEAN in rianngeitu hna he kan i ruahkhanṭi cuahmah lio a si,” tiah White House biachimnak nawlngeitu nih a chim.
US- ASEAN tonbiaruahnak hi a ṭhangcho tuk mi Tuluk(China) zuamcawhnak ah US nih thazaang ai laknak a si, tiah cheukhat mifim hna nih cun an chim i White House nih cun US-ASEAN tonbiaruahnak cu ‘A hlei in papek mi’ a si an ti. Tukum 2022 hi US- ASEAN pehtlaihnak Kum 45 nak camtuak a si.
relchap..Nizaan March 18 ah Kalay peng, Hmandaw khuapawng ah SAC ralkap le Mipi ralkap an i kahnak ah CDF KKG in ralkap pakhat a nunnak liam, tiah theih a si. Nizaan March 18 , Kalay thlanglei Cianta khua ah umhmun khuar mi SAC ralkap pawl cu Hmandaw khua lei ah rallam sial in an rat lio ah CDF-KKG Battalion -4 , PDF – Kalay, RKDF le PDF ralkap phu fonh hna nih Hmandaw khua pawng kan kah hna.
Kaphnih kahdohnak cu zaanlei sml 3:00 in 4:40 tiang suimilam 1:30 chung kan i kap i, kaphnih in hriamngan le hriamhme he kan hman, Kahdohnak ah kan ralkap pakhat nih ram le miphun caah a nunnak a pek, Pakhat nih hliamhma faak tuk lo a tuar, SAC ralkap lei in thi le hliam tuar kong theih a si rih lo, tiah Chinland Defense Force Kalay Kabaw Gangaw( CDF- KKG) nih a thanh.
Myanmar Ram Pumpi In March 18, 2022 Nikhat Chung Ah SAC Ralkap 25 An Thi: Myanmar ram pumpi in dohthlennak tuah hnu March 18, 2022 nikhat chung kahdohnak ah SAC ralkap 25 an thi, tiah Yangon Khit Thit nih a thanh. Cazin ning ah ralkap a thi mi hi Taningtari ramthen Myait ah 3, Karen ramkulh Demoso ah 10, KNU bridage 5 ah 1, Karen ramkulh Payatungsu (ဘုရားသုံးဆူ) ah 3, Magwe ramṭhen, Myaing ah 2, Shwe Bo ah 4, Mandalay ramṭhen Nuahtogyi ah 2, an dihlak 25 an si. KNU bridage 5 ah 1, Magwe ramthen Yesagyo ah 1; ti in minung 2 nih CDM an tuah.crd the chin post
