Press "Enter" to skip to content

US Hluttaw Sang MP/Senator Todd Young Nih Phunglo Ning In Nawlngaihnak Laktu Min Aung Hlaing Cozah (Ralkap) Hi A Tuhmi Theihpar Zunter Caan A Cu Cang Tiah A Chim

US um Chin miphun a kan bawm zungzaltu US Hluttaw Sang MP/Senator Todd Young nih, “Phungninglo Myanmar ralkap cozah hi a tuhmi theipar zunter caan acu cang,” tiah nizaan ah US Chin Bu (CCI) sinah a chim.

Nizaan kha US ram i Chinmi tambiknak Indianapolis khuapi ah CCI nih Bawmtu Pawl Zaanriah Danghnak Puai a tuah i atu bantukin Senator Todd Young nih a chim hi si. Ahmun ah a telpi kho hna lo nain video in bia a chimmi a kuat hna. “Tuzaan zaanriah dumnak hmun ah ka mipum in kan telpi khawh hna lo caah ka lungṭha hrim lo,” tiah Senator Todd Young nih a chim.

“Burma ram i tuksapur lainawnnak cu doh kai zuam peng ko. Cun, hika Indiana um Kawlrammi le Chinmi hna [US Hluttaw Sang ah] kan aiawhmi hna hi kai lunghmuih tuk. Kaan ṭanpi zungzal hna lai,” ati. Pu Todd Young cu US Rampumpi Hluttaw Sang (Senate) ah Indiana state mipi aiawhtu palai (Senator/MP) asi.

Chindiana tiah capo in auh tawnmi Indiana state cu US ram ah Chinmi tambiknak state asi. Chinmi 25,000 hrawng an um i vote tam tuk an ngeih caah MP (Senator le Representative) nih an ṭanh ngai hna. Phun dangin chim ahcun, Indiana ahcun Chinmi hi cozah lei ah thil an ti kho ngai ve.

Senator Todd Young nih, “Burma ram i hramhram uktu ralkap kong ahhin, US Hluttaw Sang (Senate) i ka rianṭuan hawi le Chin upa hna he biatak tein rian kan ṭuanṭi. “Tu kum US Ralkap Budget Chuahpiaknak Upadi (NDAA) ah ‘Myanmar Democracy Bawmhnak’ timi kan telh i naite ahkhan an fehter cang.

“Mah upadi hi, Myanmar ram democracy ngahter ṭhan dingin le uknak chuttu pawl dantat hna dingin Indiana um Chin upa pawl nih an kan bawmh i kap hnih party (Republican le Democratic) nih kan ṭialmi asi. “Mah upadi ahcun;

  1. US Cozah nih NUG bawmh ding
  2. Uknak chuttu Myanmar ralkap cozah cohlan lo ding
  3. Fak deuh in sipuaizi phih chap ding, tbk. pawl aa tel.

“Myanmar ralkap le an ṭanṭi ramkheltu pawl le anmah bawmtu pawl hi, kum tampi chung an tuahsernak chiakha a theipar zunter hna caan acu cang. “Burma ram democracy ngahter ṭhan dingin kai zuam peng rih lai.

Cun, hi a biapi tukmi rian pehzulhnak caah Chinmi he tu kum ah i ton ṭhan ding le nan sin in thil tampi theih chap lai kaa ngaih ko. “US Hluttaw Sang ah pumpak pakhat cio aiawhnak caanṭha nan ka pek caah kaa lawm tuk,” ati. Credit; The Chin Express

Be First to Comment

Leave a Reply

Your email address will not be published.