Press "Enter" to skip to content

US Nih Kawlram Dohthlennak Caah Millions Tam Taktak A Bawmh Cang Lai

Myanmar khuapau Dohthlennak ca ah $ 136 millions bawmhnak pek ding ti mi budget cu a rauh hlan ah US President Joe Biden nih min a thut cang lai, tiah theih a si. American Congress nih 2021-2022 budget cu March 11 ah khan an fehter i cu budget chung ah cun Myanmar ram khuapau dohthlennak ca bawmhnak pek ding ti mi zong ai tel, tiah PVTV nih a langhter.

US nih bawmhnak a pek ding mi phu pawl hna cu National Unity Government (NUG), National Unity Consaltative Council( UNCC), Committee Representing Pyidawngsu Hluttaw( CRPH), Civil Desobidience Movement ( CDM) le Tlangcung hriamtlai phu pawl (EAOs) i ukhruaitu hna le mizapi ukhruainak phu hna an si lai.

Russia Tukdohnak In Ukraine Ralkap 1300 An Nunnak A Liam Cang!: Russia nih an kan luhhnawh ni thok in atu tiang ah kan ralkap minung 1300 hrawng nih kan ram le kan miphun caah an nunnak an pek cang, tiah Ukraine President Zelensky nih a Saturday (March 13) ah a chim.

Ukraine nih hin Russia he an i tuk hnu ah a voikhatnak bik an ralkap nunnak liam mi zat mizapi sin ah an langhter i, Ukraine ralkap thizat hi President Zelensky nih media he tonnak an ngeih lio ah a chim. Russia tu nih cun March 2 ah khan Russia ralkap 500 hrawng lawng an thi rih, tiah a rak thanh i atu tiang an ralkap thizat fiangfai tein an langhter ti lo.

Ukraine President nih cun Russia ralkap a tlawmbik 12,000 cu an thi cang, tiah a chim i kan ralkap nunnak liam mi le Russia ralkap thi mi cuaithlai tikah Russia thi mi cheuhra cheukhat (1/10) lawng an si ko nain nunnak liam mi kan ralkap hna caah ka lungṭha hrim lo, tiah a chim.

Russia nih hin Ukraine tuknak ah ralkap 150,000 hman in ai tim i, March 12 thok in Ukraine ram Kyiv khua cu biatak tein Russia nih a nam lengah khuapi dang zong ah vanlawng in bomb a thlak caah Mariupol khuapi hoi hna cu bawmhchanh hau taktak dirhmun an phan.

Iraq Ram Irbil Khua Ummi US Consulate Iran Nih Missile In Kah: Iraq ram chaklei kap Irbil khuapi um mi US Consulate cu Iran nih Missile in voi 6 hrawng an kah, tiah US Security lei rianngei pakhat nih a chim.

Iran kahmi Missile pawl cu Consulate chung le a pawngkam hna ah an tla i minung thi mi tu cu an um lo, tiah theih a si. Min langhter a duh lo mi US Security rianṭuantu pakhat nih cun thawngpang zulhdawi cuahmah lio a si caah zeihmanh chim khawh si rih lo, tiah a chim.

Maina Rawn Dawr Vialte Cu SAC Ralkap Nih JCB In An Hrawh Dih: Pago ramṭhen, Taungoo peng Maina rawn ah a um mi dawr hna cu March 12 chunhnu Sml 2 hrawng ah SAC ralkap le Municipal Corporation hna nih JCB in an hrawh, tiah tualchung mi nih Yangon Khit Thit ah an chim. Chaw dawr pawl cu Taungoo peng Municipal office ah ngun khuai pek in tuah mi dawr an si hna.

Municipal office nih dawr pakhat ah phaisa an duh zat an hal hna i, zeizat nan kan pek lai ti khih piak um loin, Municipal office hal ning poh in dawr ngeitu nih phaisa cu nifatin an pek hna, tiah theih a si. Dawr hna cu khar i hrawk dih ding in Taungoo Municipal office nih March 1 ah cathanh an rak chuah cang ko nain Municipal ruanṭuantu nih dawr ngeitu hna cu phaisa liamter in dawr tuahnak nawl an onh hna, tiah theih a si. Credit: The Chin Post

Be First to Comment

Leave a Reply

Your email address will not be published.