Press "Enter" to skip to content

US Um Chinmi Phun Hna Chinram Caah Nan Timhtuahnak Tlamtling Hram Seh

Chin ramkulh chung, hmun pakhat ah a rauh hlanah Satellite Internet/Wifi bunh a si lai tiah theih a si. US um Chin miphun thiamsang hna tawlrelnak hi Satellite Internet hi bunh timh a si. Satellite company he ṭha tein i ceihkhannak le hnatlaknak zong tuah a si cang. An bunh dingmi hi 200mbps tha a ngeimi a si.

Tower pakhat nih meng 6 chung a tlaih khawh lai i mining 700 in 800 nih an hman khawh lai. Tower pakhat ah Hybrid Solar chiah dih a si lai. A voikhatnak ah Chin ramkulh chung a biapi deuh timi hmun thim in tower in bunh a si lai i hmundang zongah a herhning in chap a si te lai tiah theih a si.

Ṭuanvo ngeitu pakhat nih cun “Company he biaruahnak le hnatlaknak kan ngei dih cang. Kan hnatlaknak ningin a kal khawh ahcun tuhnu thlakhat/thlahnih chungah kan thawk khawh ko lai. Kan pehtlaihmi company kong le tower kan bunhnak ding hmun hna cu chim awk a ṭha rih lo, a caan a phak tikah nan theih te ko lai” tiah The Chin Post ah a chim.

Ralhrang nih phone, internet le wifi an phih caah Chin ramkulh hmun tampi cu an online kho hna lo. Culioah atu bantukin Chin ramkulh chungah Satellite internet bunh dingmi cu lunglawmhnak taktak a si. The Chin Post

Sagaing ramṭhen, Kanhbalu peng, Kotuangbo(ကိုးထောင်ဘို့) khua ah ralhrang phu hna nih mizapi ralkap an kah hna caah mizapi ralkap phu in minung 16 an nunnak a liam, tiah Kotaungbo Revolution KTB-R nih cathanh a chuah. February 2 ah ralhrang hna cu thazaang 100 leng he Kotuangbo khua ah an rak lut i, khuachung phungki sianginn ah umhmun an khuar i mizapi vengtu ralkap hna konglam cu an hlat hnu ah Drone hmang in an kawl hna i mizapi vengtu ralkap phu hna sakhan cu luhhnawh in an kah hna, tiah theih a si.

“An Hriamnam thazaang aa thlau tuk caah cu kahdohnak in mizapi vengtu ralkap 16 an nunnak a liam,” tiah KTB-R nih an chim. Kotuangbo( ကိုး‌ေထာင်ဘို့) khua ralhrang an luh lio ah ralhrang ṭih in a zaam mi mipi hna cu mizapi vengtu ralkap hna nih an bawmh hna ti thawng ralhrang nih an theih i an kah hna, tiah theih a si. Ralhrang phu hna nih February 3 zingka Sml 9 hrawng ah Drone an thlah. February 4 zinglei ah mizapi vengtu ralkap hna nih khuachung i a taang mi mipi hna cu an zaam khawh nakhnga rak bawm in, lampi pawng ah bia an i ruah pah hna.

Ralhrang phu hna nih Drone an thlah kha an rak hngal lo i zing Sml 10 luan deuh hrawng ah, Phungki sianginn um ralhrang hna cu an umnak in mengkhat hrawng a hlatnak hmun ah a um mi mizapi vengtu ralkap hna sin ah ruahlopi in an va phan. Khuachung lam karlak ah ruahlopi in an rak phanh caah i thuh manh a si ti lo i an i put mi kutser meithal in an kah ve hna i kaphnih kahdohnak cu a chuak colh. Ralhrang hna nih khua lu in hriamngan he an kah hna i, mizapi vengtu ralkap lei in a thi mi zong an um. Cu kahdohnak cu suimilam 2 tluk hrawng a rau, tiah KTB-R nih an langhter.

February 4 zong ah Kawlin (ကောလင်း) peng, Mihtalin Kone (မိသလင်ကုန်း) khua ah a lut mi ralhrang hna cu mizapi vengtu ralkap phu hna nih an kah hna i, an hriamnam thazaang aa dan tuk caah mizapi vengtu ralkap 13 an thi, tiah theih a si. Mizapi vengtu ralkap hna cu hriamnam an chambau tuk caah a thlithup bomb puah dohnak tu a biapi deuh in an tuah i, hi bantuk bomb puahnak hin ralhrang tamlakte an thi cang, tiah theih a si. The Chin Post

Be First to Comment

Leave a Reply

Your email address will not be published.