Press "Enter" to skip to content

“Vaipa amah hmun ah a laam” ti kan chuak than ko lo maw?

2021 February 1 cu Myanmar ram tuanbia ah ro a ling than lai-Ralkap nih a voi thumnak cozah nawlngeihnak an chuh than tiin. (1962, 1988, 2021) Atu kan dirhmun cu “Vaipa amah hmun ah a laam” ti kan chuak than. Kum 70 chung ralkap uknak kan i hneek i a kan simhtuk cang mi dirhmun ah kan kir than. Hi kong ruah deuh ahcun a pit. Lung a dong. Zeidah kan lawh te hnga? Rami nih duhlonak an langhter ning a zual chin lai, Ralkap le Palek an thinhun le hruh a zualchin tik ah zei dah a chuak kho? Zubui thingpar ah rak kaiter chung usihlaw a tanglei hna hi zeitin dah na ruah ve?

1. “Vaipa amah hmun ah a laam” ti kan chuak than ko lo maw?
A fawinak in chim ahcun, Ralkap kuli phurh than dawh kan si. Khualtlung report le hmahpungtin chek hna zong? Kan khualak ah Ralkap lubo rual i loklei than dawh an si. Lai khuate nih Kawl holh holh poh tih dawh an si cang! Rungtlang sakhan a hraang than cang lai! CNA le Cozah an i dumdawi than sual lai maw? Duhnak langhter lamzawh pawl tlaih, thongthlak, thah le nawn hna hi kha kan phan lai lo kan ti kho lo. Khuabawi tuan i fial le i hneek chan ah kir than dawh kan si. ‘Minung panga nak tam a bu in bia nan i ruah lai lo’ ti hna kha a fawite. Khuakip le sangkip zaan king sawngh hna kha a um than sual hnga maw? Khuabawi tlaih le thong thlak he hna khan kan i hlaattuk lem rua lai lo dah!

Chin nungak nih Ralkap (Kawl pa) uar le vaat chan ah kan kir than sual hna hnga maw? Cozah zungkip lutlai ah angki hring lawngte an si than lai maw? Khrihfa biaknak phihkhar kan tong than lai maw? Burmanization (Kawl nih khuhchilhnak) ti mi: kan nunphung, biaknak le caholh a phunphun in phihkhar kan tong than sual lai maw? an kan tim than sual lai maw? Khrihfa si ruang ah Chinmi cozah riantuan pawl rank sang kai zong har than dawh a si cang! Kan Chinram ramchung chuak thing le zeidang hna kha Kawl rawn lei ah an zuanpi than sual lai maw? Kan mirum pawl nih ralkap tawzaat le lenkai an i zuam than hnga maw? NLD in Ralkap croney ah an kir than sual hna hnga maw?

Ngakchia tap mi ngamternak ah “Cuh, ralkap an ra cuh!” ti kan hmang than sual hnga maw? Tlangcung hriamtlai pawl he i kahnak a zual lai i ramchung raal a tho than lai lo ti chim khawh a si ti lo? Siangin khar in kan fale fimcawnnak an dong an bul than men lai. Ramleng nih sipuazi a phunphun in an phihkhar lai i vawlei cung ah sifakbik dirhmun ah khan kir than dawh kan si. Ramleng le UN nih “na luantuk cang” tiin fungfek in an van chimhring te sual hnga maw?

Laitlang ah ramdangmi kai an khap than khawh mi a si. Malay le Delhi ah raalzaam dirhmun in mitthli he kal than kan hau sual hnga maw? Ralkap sakhan umnak Lungler le Vawngtu tibantuk khua kiangkap pawl, aa-na in ralkap sakhan sakter a um than sual hnga maw? Laitlang ah Kawl pawl hlawhfa le company rian in caangvat bang an rak kai luaimai sual hnga maw? “Chinram cu coffee Ramkulh a si lai” ti mi ah kan kir than sual hnga maw? Aa-na tlaang riantuan hna kha a um than sual hnga maw? Cozah riantuantu pawl, USDP le NLD cozah chan nakin ziknawh eihmuar an zual deuh sual lai maw? Kan khua le ram hmun, an duh poh in chuh (ting) le sawksaam a um than sual hnga maw? Ramkheel party pawl cawlcanghnak nawl phit in amah nih party a ser mi lawng vokthau zuat in a zua than sual hnga maw?

Ralkap uknak chung i kan phanh cang ko ahcun kan i puk-hnaat ti rua lai lo. A cunglei i kan chim mi hna hi kan phan lai lo ti kan chim kho ti lo. Kan ram uknak le ramkheel tihna a fim deng cang kan ti lio ah a nawi than cang. Kan raang cang rua lai kan ti mi dum than dawh kan si cang! Zeicatiah hi vialte hi kumpi kum 70 chung an rak hman cang mi rammi an dehcawhnak an zia a si. Cakei cu zuat mi hmanh a zia le a tial a chuah ahcun a zuatu zong a hual lo. An tial le an ho an chuah than cang kan ti kho lai maw?

2. Min Aung Hlaing hih tah a piangthar sual hnga maw?
———————————————————————-
Kan Laiholh ah “Ka lun lo nih chi ka barh” ti a um. Min Aung Hlaing hi hlan chan Ralbawi a si lo-chanthar Ralbawi a si. Chan hlun Ralbawi bantuk in mah rumnak le pum i ven lawng ruat lo in, kum 70 chung a pule (Ne Win le Than Shwe) nih rammi, a bik in Tlangcungmi lung an fahter mi kha tuahpiak an lung tluanh khawh hna hi a rak i tim ziar hnga maw? NLD cozah (Daw Aung San Suu Kyi) nak tha deuh in ram ser le thanchoter khawh hna hi rak i tinh ziar pingpang hnga maw? Tlangcung hriamtlai le party pawl nih mama hauh in an hauh mi, Federal hna hi Daw Aung San Suu Kyi kut in si lo in amah (Ralkap) kut in pek aa timh hna a si sual hnga maw?

Tlangcung hriamtlai pawl he tuah lio mi Rampi remdaihnak rian zong hi NLD cozah tawlrelnak in si lo in amah kut in tlamtlinter le Tlangcung hriamtlai le party pawl nih paput laangcawihnak lam hna a rak kawl ziar hnga maw? ‘Vawlei cung ah a chiabik le remh harbik’ tiin soisel mi 2008 Phunghram kha NLD (Daw Aung San Suu Kyi) tawlrelnak in remh lo in, anmah Ralkap kutneh hmabaan a si bantuk an tuanbia thianchehnak ca ah amah nih Tlangcungmi duh ning tein remh hna a duh bia a si sual hnga maw?

Cun atu cu kum 70 leng Tlangcung hriamtlai, party, rammi vialte nih thisen le thlanti he khaan kan hnawh i kan dumdawi mi Federal le Democracy salu pi cu Democracy zalampi an phanhpi cang i a rauh hlan ah inn a phan ding a si cang. Asinain Ralkap hi sakaptu ah telh ve lo ding dirhmun ah an um kha an i hngalh tik ah sunglawite le min tha tein salu he tlun ve an i timh hna a si sual hnga maw? Khaan hnawhtu nakin sakaptu si cu aa thim deuh hnga lo maw?

Min Aung Hlaing hi pensen a la ding a si cang tikah a caan chung ah lim ta lo mi rian biapi ngeih dawh a si. Cucu: a pu Than Shwe nih “Ka nehnang le Ralkap tuanbia hi tha tein van fimtawl te, tiin rian nganpi a khinh mi kha a lim ta rua lo. Cucu a cunglei ah kan langhter mi rian pawl kha a si. “Ka tuan hrimhrim lai” tiah bia aa kam bantuk in beelnaang aa thuh mi a pule le Ralkap tuanbia kha thiang tein thianhhlimh le nehnang fimtawl ta a duh ca ah a si sual hnga maw?

Than Shwe nih tuanvo a pek mi ah hin: Than Shwe a nun chung Pi Suu le Cozah a tlai mi nih tuaitam khawh lo ding in humhimnak tuanvo laakpiak ding, cun Ralkap kut in Phunghram hi rammi duhning tein remh ta hnu ah party kut ah pek, cun Tlangcungmi nih an hal peng mi Federal zong an i hauh ning tein pek, ramchung raal daihter le rammi nih an duh mi Democracy thanchonak sersiampiak i an lung awiter ta tibantuk hna hi a rian ah a rak i chiah ziar hna a rak hnga maw?

Nang zei dirhmun dah kan phan lai tiah na ruah?
———————————————————————
Ralkap uknak zeitluk in dah a rak chiat ti a thei manh lo mi thangthar nih cun a ruahdamh awk a hngal lo mi an um men lai. Asinain upa deuh nih cun Ralkap uknak cu Baibal ca nih a kan cawnpiak mi “Khamh fian” nak hmanh in aa fiang mi lawngte kan si lai. Cutluk in a zia kan hngalh cang mi Ralkap nih “Kum khat chung uknak ka tlaih ta than lai” a ti mi tik ah hi kum khat chung ah hin rammi zei dirhmun dah kan phanh te hnga?#

Be First to Comment

Leave a Reply

Your email address will not be published. Required fields are marked *