Yangon Ah Inn A Kang Cuahmah Ee, Mipi An Nunnak Caah Tih A Nung, Thlalawng Ong In An Tum Cuahmah Hna

#Hamnthlak_Thawng; Yangon Myo, Mingala Taungnyunt peng ah nihin Nohawng 15 ah inn a kang i a pawngkam inn khan hna ah a ummi minung hna an nunnak caah tuak in an zam cionak hmanthlak a si.

Inn a kangh hi suimilam 2:50pm hrawng ah a si i suimilam 3:20 hrawng ah cun an hmih khawh cang tiah theih a si. #CCN_Channel

Relchap; Sagaing ramṭhen, Khin U peng ah SAC nih Martial Law an chuah hnu ni 9 chung ah khuate 7 nak tlawm lo an khangh cang, tiah theih a si.

February ni 2 ah SAC nih peng 37 ah Martial Law an chuah hnu in Khin U peng ah nifatin in rallam an sial i Tenatsein le Sawkyi khua cu an khangh caah khuami a thong leng ralhrial in an zaam, tiah theih a si.

Ralhrial in a zaammi hna chung ah naupawi lio nu hna zong an i tel. Caan karlak an i dor chungnak thlam hna zong SAC ralkap nih an khanghpiak dih hna. Umnak, eidin le hnipuan zong an herh tuk, tiah Khin U peng thawngpang fianternak phu nih an chim.

February ni 13 zong ah Minkankyi, Letpanhla le Laungshi khua zong an khangh. Pawngkam ummi khuate 5 in khuami hna cu ralhrial in an zaam dih hna, tiah theih a si.

SAC ralkap cu Khin U peng ah rallam an sial lengmang caah Myaung peng, Mayukone le Kyikone khuami zong a himnak hmun ah an zaam, tiah theih a si. Crd; The Chin Post

Sagaing ramṭhen, Shwebo peng Ṭinṭey le Kyaukmyint khua cu SAC ralkap nih an khangh pin ah khuami 4 mei in an khangh hna, tiah tualchung mi hna nih an chim.

February ni 12 zing suimilam 10:00AM hrawng ah SAC ralkap le pyusawhti nih Ṭinṭey le Kyaukmyint khua cu hriamngan le hriamhme he an kah hnu ah an lut i, khuami inn cu an khangh pin ah pa 2 le nu 2 zong mei in an khangh hna, tiah theih a si.

Pa 2 le nu 2 cu SAC ralkap nih mei in an khangh hna. Pakhat pa cu a hngawng an tan. Nu pakhat hi a hawi lo lomi a si i khuami kan zaam lio zong ah kan auh ko nain a duh lomi a si, tiah khuami hna nih an chim.

Ṭinṭey khua cu inn 250 hrawng a umnak khuate a si i SAC ralkap nih an khangh ruang ah khua ning tluk in a ciam. Kyaukmyint khua zong a cheu hrawng a ciam ve. Khuami an ngeihchiah chawva vialte cu an khanghpiak dih hna, tiah theih a si.

Voi dang ah cun pyusawhti pawl cu an hna a ngam ko. Atu cu kan inn le kan lo zong an kan khanghpiak dih cang. Leithuan, facang ah le a dangdang rianṭuan kan duh caan paoh ah anmah va chimh ta an hau. Cu pin ah ngunkhuai tampi an kan khawlh i kan pek hna. Zu, facang, chiti tibantuk zong an kan hal caah kan pek zungzal hna, tiah khuami nih an chim. TCP