Yangon , Dala le Hlaing Ta ya ah Dalan Minung Pa 2 An Thah Hna
Yangon ramthen khua Dala khua ah SAC ralhrang thawngzamhtu a si tiin zumhmi Bolay rawldawr a ngeitu Han Tin le a nupi cu march 7, 2022 zaanlei 7:00 pm hrawng ah a hosi ti theih lomi, meithal kah thiam bu nih luhhnawh in an kah hna, dawr ngeitu cu a thi colh. A nupi bel cu hmafak ngai tuar in siizung ah an kal pi.
Hlaing Ta Ya khua, Sang 5 nak ah a ummi, ralhrang thawngpetu Minh Aung zong March 6,2022 , chunlai 12: 30 pm hrawng ah Spring Brothers Force phu nih luhhnawh in a va ka, a hmun ah a thil colh ve tiah thei a si.
Minh Aung hi mipi tangka hal in SAC ralhrang bawmhchantu a sipinah aruang umloin mipi vuak hmang le zudingsaei hmangmi si , cu ruang ah tihin Spring Brothers Force nih an va thahnak hi a si.
thawngdang…..Karenni ramkulh, Demoso peng Ciohsekaan (ကျောက်ဆည်ကန်) le Tesulay(သေးဆူလဲ) khua ah SAC ralkap thazaang tampi he rallam a sial mi ralbawi(sit-cawng-hmu) aa tel mi ralkap phu cu Karenni-PDF phufonh hna nih an kah hna i ralkap a thi mi an tam, tiah DMO- Local PDF (Demoso) nih an thanh.
Demoso peng, Nguaitaung(ငွေတောင်) khuakomh Aungchiantar khua, Ciohsekaan le Tesulay khua hna ah nizaan March 7 ah chunnitlak deng kahdohnak a chuak i SAC ralkap lei a thi mi an tam, tiah theih a si. “SAC ralkap lei nih vanlawng in an kah tuk caah kanmah lei zong aa kawng deng mi an um ve,” tiah DMO PDF in chim phuannak nawlngeitu nih a chim.
SAC ralkap lei nih kahdohnak a chuah lio chun Sml 12 hrawng ah helicopter 2 le vanlawng 2 in voi 15 bomb an thlak pin ah zaanlei Sml 7 zong ah vanlawng 1 in bomb an thlak ṭhan i mipi inn 15 a rawk, tiah theih a si. Nihin March 8 zing Sml 2 zong ah vanlawng 1 in bomb an thlak ṭhan i RC Biakinn pakhat a rawk, tiah theih a si.
Karenni ralkulh chung ah thazaang tampi he rallam a sial mi SAC ralkap hna cu tualchung hriamtlai phu DMO-Local PDF(Demoso), Loikaw PDF, Phekhung PDF, Moebe PDF, CTU, Central Region Task Force, KNDF, KA, KGZ, GZ-21 le a dang dohthlennak tuahtu phu hna i bawm in an doh hna, tiah theih a si.
