Yee Oo Mipi Vengtu Ralkap Hna Nih SAC Uico Ralkap 30 Hrawng An Thah Khawh Than Hna
Sagaing ramṭhen, Yee Oo peng thlanglei kap Segyi(ဆည်ကြီး) khua lei ah a rak lut mi SAC ralkap motor 2 cu March 21 zaanlei sang ah bomb puahhnawh an si i, SAC ralkap 30 an thi, tiah Yee Oo PDF nih thawng an thanh. Bomb puahhnawh ruangah a ke kek mi SAC motor a hnu lei kuang ah SAC ralkap pawl ruak hmuh a si, tiah an chim.
Kahdohnak hi Yee Oo PDF le Yee Oo pah-kah-phah hna i bawm in an tuah mi a si i, PDF lei hliamtuar um lo tein hnu an tolh kho ṭhan, tiah theih a si. Cubantuk ṭhiam cun Sagaing ramṭhen, Pale peng nichuahlei mengkhat tluk a hlatnak Innkung khua lam tonnak ah nihin March 22 zing Sml 11:30 hrawng ah SAC ralkap motor pakhat cu tualchung hriamtlai phu nih bomb an puah in an doh i, SAC ralkap 4 an thi, tiah theih a si.
Cu SAC ralkap hna cu Daungnet nesimachia pyohcia phu(ဒေါင်းနက်နယ်စည်းမခြားပြောက်ကြား) nih an doh hna i, SAC ralkap 4 an thih colh lengah midang 8 faak ngai in hliam an tuar, tiah theih a si. Alaycuun khua hi pyosawthi an tamnak khua a si i, SAC ralkap le pyosawthi an ṭih ruangah khua mi hna an zaamnak hi thla 5 hrawng a si cang. Eidin tirawl le fenheih ah harsa ngai in an um, tiah theih a si. Credit; The Chin Post
Mizoram, khualipi Aizawl Milinium Center ah March 18-19 nihnih chung ralzaam bawmhnak caah fundraising tuah a si i, hi caan ah hin Myanmar phaisa in sing 130 leng an hmuh, tiah theih a si. Atutan Fundraising tuahnak ah bawmhnak bawm chung ah sanh mi hi ₹ 94,857 a si i, thil zuarnak in Rs. 4,74,050 , a dihlak fonh Rs. 5,78,907 a si. Myanmar phaisa in 13,466,260 mmk an hmuh, tiah theih a si.
Hi bawmhnak an hmuh mi vialte hi Youth For Myanmar(YFM) nih a herh an tinak ralzaam camp ah an hlut lai i, ramchung ralzaam camp zong ah bawmnak hi pek a si lai, tiah YFM hruaitu Ma WaWa nih a chim. Ralzaam bawmhnak Fundraising a nikhatnak ah Hlasakthiam Thun Kham le Chin hlasakthiam tampi nih an telpi hna i, a nihnihnak ah tulio Mizoram ah a lar ngai mi Guys from Chin pinah Myanmar hlasakthiam Yaw Kee zong nih a telpi hna.
A voikhatnak i ralzaam bawmhnak Fundraising an tuah lio ah an hmuh mi phaisa in Sairang camp, Sihtlangpui camp, East Kawlcaw camp le Vanhne camp ralzaam hna an rak bawmh hna.
